Қурбоналӣ Абдураҳимзода

(Тағйири масир аз Қурбоналӣ Бӯриев)

Абдураҳимзода Қурбонали Бозор (Бӯризода Қурбоналӣ Бозор, Бӯриев Қурбоналӣ Бозорович[1] то 2020 Бӯриев Қурбоналӣ Бозорович; 20 ноябри 1964, ноҳияи Ленин, ҶШС Тоҷикистон) — китобшиноси тоҷик, номзади илмҳои таърих, дотсент, Аълочии фарҳанги Ҷумҳурии Тоҷикистон (2012), Аълочии маорифи Ҷумҳурии Тоҷикистон (2015), Аълочии матбуоти Тоҷикистон (2018), Аълочии телевизион ва радиои Тоҷикистон (2020).

Абдураҳимзода Курбонали Бозор
Абдураҳимзода Қурбоналӣ Бозор
Таърихи таваллуд: 20 ноябр 1964(1964-11-20) (56 сол)
Зодгоҳ: ноҳияи Ленин, ҶШС Тоҷикистон
Кишвар:  Тоҷикистон
Фазои илмӣ: китобшиносӣ, таърих
Дараҷаи илмӣ: номзади илмҳои таърих
Унвонҳои илмӣ: дотсент
Роҳбари илмӣ: академик Нуъмон Неъматов
Ҷоизаҳо: Медали «Хидмати Шоиста»
Аълочии фарҳанги Ҷумҳурии Тоҷикистон
Аълочии маорифи ва илми Ҷумҳурии Тоҷикистон
Аълочии матбуоти Ҷумҳурии Тоҷикистон, Аълочии телевизион ва радиои Тоҷикистон.

ЗиндагиномаВироиш

Абдураҳимзода Қурбоналӣ Бозор 20 ноябри соли 1964 дар деҳаи Қуштеппаи ноҳияи Ленин (ҳоло ноҳияи Рӯдакӣ) ба дунё омадааст. Пас аз хатми мактаби миёна соли 1982 ба факултаи китобдории Донишкадаи давлатии санъати Тоҷикистон ба номи М. Турсунзода дохил шуд, пас аз хатми соли аввали хониш ба сафи Қувваҳои Мусаллаҳи ИҶШС даъват мегардад ва баъди адои он (1983—1985) як соли дигар дар факултаи китобдории Донишкадаи давлатии санъати Тоҷикистон ба номи М. Турсунзода таҳсилро идома дода, сипас ба таври гузариш таҳсилро дар Донишкадаи даватии маданияти Маскав идома медиҳад ва дар соли 1988 бомуваффақият хатм менамояд. Аз моҳи августи соли 1988 ба ҳайси омӯзгори кафедраи библиографияшиносии факултаи китобдории Донишкадаи давлатии санъати Тоҷикистон ба номи М. Турсунзода ба фаъолияти меҳнатӣ оғоз менамояд.

Фаъолияти корӣВироиш

Тавре ки зикр гардид, Абдураҳимзода Қурбоналӣ Бозор фаъолияти кориашро ба сифати омӯзгори кафедраи библиографишиносии факултаи китобдории Донишкадаи давлатии санъати Тоҷикистон ба номи М. Турсунзода пас аз хатми Донишкадаи давлатии маданияти Маска ДДММ аз моҳи августи соли 1988 оғоз менамояд ва солҳои 1993—1997 ба ҳайси унвонҷӯ дар Институти таърих, бостоншиносӣ ва мардумшиносии АИ Тоҷикистон фаъолият намуда, дар солҳои 1997—2001 ба ҳайси мудири шӯъбаи Китобхонаи давлатии бачагонаи ҷумҳуриявӣ ифои вазифа карда, солҳои 2001—2008 дар ташкилоти ғайридавлатии башардӯстонаи CARE International [КАРЕ интернейшл] ба ҳайси тренер ва офитсери барнома хидмат намудааст. Аз 18-уми майи соли 2009 то 22-уми майи соли 2015 ба ҳайси директори Пажӯҳишгоҳи илмӣ тадқиқотии фарҳанг ва иттилоот фаъолият намуда, аз 4-уми июни соли 2015 то 18-уми июни соли 2020 ба ҳайси директори генералии «Агентии миллии созмони байналмилалии рақамгузории стандарти китоб — Хонаи китоби Тоҷикистон»-и Вазорати фарҳанги Ҷумҳурии Тоҷикистон адои вазифа намудааст. Аз 18-уми июни соли 2020 бо Қарори Ҳукумати Ҷумҳурии Тоҷикистон ба вазифаи муовини вазири фарханги Ҷумҳурии Тоҷикистон таъйин гардидааст.

Фаъолияти илмӣВироиш

Абдураҳимзода Қурбоналӣ Бозор перомуни пайдоиши иттилооти библиографӣ дар китобхонаҳои ҷумҳурӣ, фаъолияти китобдорӣ дар Тоҷикистон, сарчашмаҳои соҳаи китобдорӣ, таърихи китобу китобхонаҳо, библиографияи тоҷик дар давраи Сомониён ва ба баъд, ҳамкории Тоҷикистону Русия дар соҳаи китобдорӣ ва тарбияи кадрҳо, таърихи сарчашмашиносии форсӣ-тоҷикии библиографӣ ва ғайра пажӯҳиш мебарад. Ӯ муаллифи беш аз 300 мақола, 15 маҷмӯаи соҳавӣ ва 13 асари илмӣ мебошад.

Вале таваҷҷӯҳи асосии тадқиқотии ӯро масоили библиографияи кишоварзии миллӣ ва таърихи библиографияи тоҷик маҳтуф доштааст. Солҳои охир бештар дар мавзӯи библиографияи давлатӣ ва таърихи библиографияи тоҷик таҳқиқотҳои назаррас анҷом додааст. Аз ҷумла асарҳои «Заминаҳои пайдоиш ва рушди библиографияи кишоварзӣ» таҳти назари академик Нуъмон Неъматов, "Пайдоиш ва рушди библиографияи кишоварзӣ", "Таърихи библиографияи кишоварзӣ", "Таърихи библиографияи тоҷик" ва ғайра ба қалами ӯ таалуқ доранд. Абдураҳимзода Қурбоналӣ Бозор диққати ҷиддӣ ба масоили пайдоиши аломатҳои тасвири библиографӣ дар осори ниёгон, истифодаи иқтибос ва истинодҳо аз эҷодиёти олимону мутахассисон, хусусан дар рисолаҳои кишоварзӣ, феҳристҳои китобхона, нишондиҳандаҳои алоҳида ва инъикоси адабиёти кишоварзӣ дар адабиёти илмию адабӣ ва соҳавӣ маълумоти зиёд гирдоварӣ намуда, ба хулосае меояд, ки библиографияи кишоварзӣ дар сарҳади Тоҷикистони таърихӣ то пайдоиши назарияи он васеъ истифода шудааст.

Рисолаи дигари Абдураҳимзода Қурбоналӣ Бозор «Таърихи кишоварзии Тоҷикистон дар асоси сарчашмаҳои хаттӣ» (соли 2002) дар асоси маводи таърихии халқи тоҷик, дастхатҳои соҳавӣ ва асарҳои илмии олимони таърихшинос ва кишоварз офарида шуда, дар он таърихи соҳаи кишоварзӣ аз замони пайдоиш то кунун инъикос меёбад.

Дар рисолаи «Библиография дар аҳди Сомониён» (соли 1999) таърихи мухтасари мавҷудияти библиографияи тоҷик бо таҳлили сарчашмаҳои илмӣ, адабӣ, таърихӣ, фалсафӣ, тиббӣ, шарҳиҳолӣ, библиографии мансуби замон бо далелҳои мушаххас баррасӣ гардидааст, дар бораи қадамҳои аввалини табақабандии илм ва ҳамзамон шаклу намудҳои гуногуни мавҷудияти дастурҳои библиографии аҳди Сомониён хулоса ва пешниҳодҳои ҷолиб пешкаши хонанда гардидааст.

Абдураҳимзода Қурбоналӣ Бозор ҳамчун китобшинос, таърихнигор ва фарҳангшинос перомуни ҳаёту фаъолияти як идда китобшиносони маъруфи ҷумҳурӣ очерку лавҳа ва мақолаҳо навиштааст, дар мавриди ҳамкориҳои фарҳангии Тоҷикистон бо Русия, Қазоқистон, Ӯзбекистон силсилаи мақолаҳо аз даст баровардааст. Ӯ дар солҳои охир зиёда аз 10 маҷмӯаҳои соҳавии "Фаъолияти китобдорӣ дар Тоҷикистон. Китобҳои I - IX" (2010 - 2020), се маҷмӯаи "Библиографияшиносӣ ва китобшиносӣ дар Тоҷикистон. Китобҳои I - III" (2018-2020), "Фаъолияти инноватсионӣ дар соҳаи китобдорӣ" (2018), инчунин рисолаҳои алоҳидаи "Библиографияи кишоварзии тоҷик" (2011, 160 с.), "Таърихи библиографияи кишоварзӣ" (2011, 176 с.), "История таджикской библиографии" (2014, 176 с.), "Таърихи библиографияи тоҷик" (2017, 260 с.), "Фаъолияти китобдорӣ дар пажӯҳишҳои илмӣ. Китоби II" (2020, 640 с.), "Научные исследования библиотечной деятельности. Книга III" (2020, 480 с.) ва ғайраро эҷод ва нашр намудааст.

Нишону ҷоизаҳоВироиш

  • Медали «Хидмати Шоиста» (2016)
  • Аълочии фарҳанги Ҷумҳурии Тоҷикистон (2012)
  • Аълочии маорифи ва илми Ҷумҳурии Тоҷикистон (2015)
  • Аълочии матбуоти Чумхурии Тоҷикистон (2018),
  • Аълочии телевизион ва радиои Тоҷикистон (2020)

Намунаи осорВироиш

  • Возникновение и развитие сельскохозяйственной библиографии [Текст]/ Под ред. академика Н. Негматова. — Душанбе, 2000. −104 с.
  • История сельского хозяйства Таджикистана (на основе рукописного наследия) [Текст] / Под ред. академика Н. Негматова. — Душанбе, 2002. — 167 с.
  • Библиография дар аҳди Сомониён [Матн]. — Душанбе, 1999. — 27 с.
  • История возникновения и развития сельскохозяйственной библиографии [Текст]. — Душанбе, 2010.-128 с.
  • Библиографияи кишоварзии тоҷик [Матн]: Мавод барои омӯзиши фан. — Душанбе, 2011.-160 с.
  • Таърихи библиографияи кишоварзӣ [Матн]: Монография. — Душанбе, 2011. — 176 с.
  • История таджикской библиографии [Текст]. — Душанбе: Ирфон, 2014. — 176 с.
  • Таърихи библиографияи тоҷик [Текст]. — Душанбе: Ирфон, 2017. — 260 с.
  • Фаъолияти китобдорӣ дар пажӯҳишҳои илмӣ. Китоби II. - Душанбе: Аржанг, 2020. - 640 с.
  • Научные исследования библиотечной деятельности. Книга III. - Душанбе: Аржанг, 2020. - 480 с.

ЭзоҳВироиш

  1. Абдураҳимзода Қурбонали Бозор. www.vfarhang.tj. 18 августи 2020 санҷида шуд.