Ампутатсия

Ампутатсия (лот. amputatio - бурида дур кардан) — амали ҷарроҳист, ки қисми канории дасту пой ё аъзои иллатнок (мас., ғадуди шир, гарданаи бачадон ва ғайра)-ро мебуранд.

Тасвири раванди ампутатсия аз дастури омӯзиши ҷарроҳӣ (соли 1537)

Қисман ампутатсия кардани дасту пойро экзартикулятсия ва пурра ампутатсия кардани аъзоро экстирпатсия меноманд. Фақат дар сурате ампутатсия мекунанд, ки ягон узви бадан аз кор монад ё ки хавфе ба ҳаёти бемор оварад. Ампутатсияи дасту пой яке аз қадимтарин усулҳои ҷарроҳӣ мебошад. Тамоми зинаҳои он ҳанӯз ба духтурони Юнони Қадим, мас., Буқрот (асри 4 то м.) маълум буд. Ба ампутатсия духтурони Руми Бостон (асри 2) Села ва Архиген асос гузоштанд. Минбаъд тӯли садсолаҳо нишондодҳои ин олимон роҷеъ ба пешгирии хунравӣ фаромӯш гаштанд. Ҳамин тавр, ампутатсия фақат садаи XVI, баъди аз ҷониби ҷарроҳи франсавӣ ампутатсия Паре дарёфтани усули бастани рагҳое, ки ҳангоми ампутатсия бурида мешаванд, имконпазир гашт. Тибби муосир барои роҳ надодан ба чирк гирифтани ҷароҳат чораҳои эътимоднок (тоза кардани ҷароҳат, истифодаи антибиотикҳо ва ғайра)-ро ба кор мебарад. Аз ин сабаб ҳатто дасту пой ё аъзои хеле сахт захмдоршударо низ бе ампутатсия сиҳат кардан мумкин аст. Ҳангоми ампутатсия ҳаминро ба назар мегиранд, ки қисми боқимондаи дасту пой барои протез кардан мувофиқ гардад.

Сарчашма

• Ампутатсия // А — Асос. — Д. : СИЭМТ, 2011. — (Энсиклопедияи Миллии Тоҷик : [тахм. 25 ҷ.] / сармуҳаррир А. Қурбонов ; 2011—2023, ҷ. 1). — ISBN 978-99947-33-45-3.