Ангури сиёҳи хонатарош
Ангури сиёҳи хонатарош, ангури сиёҳи муъминободӣ — навъе аз ангурҳои маҳаллӣ. Баргаш миёнаҳаҷми 3—5-парра, гулаш дуҷинса.
Вобаста ба шароити парвариш хӯшаҳояш ҳаҷман гуногун (дарозиаш 18—23 см, бараш 15—16 см, вазнаш 270—340 г) мешаванд. Ҳар хӯша 95—120 ғужб дорад; ғужбаш калон (17Х16 мм), лӯнда, сиёҳи ҷигаритоб (1—3-то тухм дорад). Ғужмаш хамираки сершира, нордони гуворо; ҳангоми пурра пухтан дар таркибаш 22—23 % қанд ва 3,8—4,6 г/л туршӣ мавҷуд аст. Токаш зудсабз, дар заминҳои обӣ ва лалмӣ хуб месабзад. To ox. тирамоҳ 80—85 фоизи навдаҳояш мерасад (44—48 фоизашон самароваранд). Ниҳолаш баъди 3 соли шинондан ба ҳосил медарояд. Дар шароити ноҳияи Муъминобод ангури сиёҳи хонатарош охири май гул карда, ох. авг. мепазад. Аз 1 га токзор 120—135 сентнер ҳосил меғундоранд. Ҳосилашро тар мехӯранд, мавиз мекунанд, аз он мураббо мепазанд, дар майкашӣ истифода мебаранд. Барои зимистон нигоҳ доштан мумкин. Аз ҳаҷми тараш 26 % мавизи сиёҳи калондона ҳосил мешавад. Ангури сиёҳи хонатарош навъи хоси ноҳияи Муъминобод буда, бештар дар деҳаҳои он парвариш меёбад. Токаш ба сармо, камобӣ ва касалиҳои занбӯруғӣ тобовар аст.
Эзоҳ
вироишАдабиёт
вироиш- Раҷабов Қ., Маълумотномаи токпарвар, Д., 1986;
- Ампелография СССР. Малораспространённые сорта винограда, т. 1, М., 1961.
Сарчашма
вироиш- Ангури сиёҳи хонатарош // А — Асос. — Д. : СИЭМТ, 2011. — (Энсиклопедияи Миллии Тоҷик : [тахм. 25 ҷ.] / сармуҳаррир А. Қурбонов ; 2011—2023, ҷ. 1). — ISBN 978-99947-33-45-3.