Гармои сӯзиш

Гармои сӯзиш — қобилияти гармоофарӣ, гармоофарандагӣ, гармоистеҳсолкунандагӣ, калориянокӣ, миқдори гармое, ки ҳангоми тамоман сӯхтани сӯзишвории сахт, моеъ ё газмонанд хориҷ мешавад; бо ҷоул ё калория чен мекунанд.

Гармои сӯзиш поёнӣ ва болоӣ, хос ва ҳаҷмӣ мешавад. Гармои сӯзише, ки ба воҳиди масса ё ҳаҷми сӯзишворӣ нисбат дорад, гармои сӯзиш-и хос (кҶ/кг, ккал/м³) номида мешавад. гармои сӯзиш нишондиҳандаи муҳимтарини иқтидор (қимати ҳақиқӣ)-и сӯзишворӣ аст, зеро он миқдори гармоеро муайян мекунад, ки ҳангоми сӯхтани 1 кг сӯзишвории сахт ё моеъ ё 1 м³ сӯзишвории газмонанд (дар кҶ/кг ё ккал/кг) ҳосил мешавад. Гармои сӯзишро бо калориметр чен мекунанд. Агар оби таркиби сӯзишворӣ ҳангоми сӯхтани ҳидрогени сӯзишворӣ дар шакли моеъ ҳосил шавад, гармои сӯзиш болоӣ (Ԛ_б) ва агар об дар шакли газ ҷудо шавад, гармои сӯзиш поёнӣ (Q_п) мешавад. Гармои сӯзиши болоӣ ва поёнӣ ба ҳам бо таносуби: Q_п=Ԛ_б — K (W + 9H) вобастаанд, ки дар ин ҷо K — зариби баробари 25 кҶ/кг (6 ккал/кг), W — миқдори оби сӯзишворӣ, % (аз рӯйи масса), Н — миқдори ҳидружени сӯзишворӣ, бо % (аз рӯйи масса) мебошанд.

Сарчашма

• Гармои сӯзиш / С. Табаров // Вичлас — Гӯянда. — Д. : СИЭМТ, 2015. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 4). — ISBN 978-99947-33-77-4.