Исмоил Давлатов

Исмоил Давлатов (25 декабри 1946, деҳаи Сағирдашт, ноҳияи Дарвоз, ВАКБ, ҶШС Тоҷикистон — 26 ноябри 2000, Душанбе, Тоҷикистон) — давлатмарди тоҷик, иқтисоддон, доктори илмҳои иқтисод (1986), профессор (1989). Вазири маорифи Тоҷикистон (1990—1992).

Исмоил Давлатов
Раиси Кумитаи гумруки назди Ҳукумати Ҷумҳурии Тоҷикистон
15 августи 1997 — 1998
Пешгузашта	Худойқул Ҳамроқулов
Ҷонишин	Абдураҳим Каримов
Вазири ҳифзи табиати Ҷумҳурии Тоҷикистон
1994 — 15 августи 1997
Пешгузашта	Сайдулло Хайруллоев
Ҷонишин	Неъматулло Сафаров
Вазири иқтисод ва молияи Ҷумҳурии Тоҷикистон
майи 1992 — августи 1992
Вазири маорифи Ҷумҳурии Тоҷикистон
1990 — 1992
Пешгузашта	Талбак Назаров
Ҷонишин	Зокир Вазиров
Таваллуд	25 декабр 1946(1946-12-25)
Даргузашт	26 ноябр 2000(2000-11-26) (53 сол) Душанбе, Тоҷикистон
Таҳсилот	Университети давлатии Тоҷикистон ба номи В. И. Ленин
Дараҷаи илмӣ	доктори илмҳои иқтисод
Унвони илмӣ	профессор

Зиндагинома

Исмоил Давлатов 15-уми декабри соли 1946 ба дунё омадааст. Соли 1963 Техникуми омори ноҳияи Орҷоникидзеобод ва соли 1969 Университети Давлатии Тоҷикистон ба номи В. И. Ленинро хатм карда, дар кафедраи иқтисоди сиёсии ин ҷо ҳамчун лаборанти калон ба фаъолият пардохт. Солҳои 1972—1975 дар аспирантураи ҳамин донишгоҳ хонда, 1975—1983 ҳамчун муаллими калон, дотсенти кафедраи иқтисоди сиёсии Донишгоҳи давлатии Тоҷикистон ба номи В. И. Ленин, 1984—1986 докторанти Институти молиявӣ-иқтисодии шаҳри Ленинград (ҳоло шаҳри Санкт-Петербург), 1986—1988 мудири кафедраи иқтисоди сиёсии Донишгоҳи давлатии Тоҷикистон ба номи В. И. Ленин, 1988—1990 ректори Донишгоҳи давлатии Тоҷикистон ба номи В. И. Ленин, 1990—1992 Вазири маорифи Тоҷикистон буд. Аз соли 1993—1994 муовини Вазири маорифи ҷумҳурӣ, 1994—1997 Вазири ҳифзи табиати ҷумҳурӣ, раиси Кумитаи гумруки ҷумҳуриро иҷро кардааст.

Cоли 1994 доктори илмҳои иқтисодӣ, профессор Исмоил Давлатов Вазири ҳифзи табиати Ҷумҳурии Тоҷикистон таъйин гардид ва то июли соли 1997 дар ин мансаб адои вазифа намудааст. Потенсиали кадрии Вазорат дар ҳамин давра то як андоза афзуд. Бо як қатор давлатҳои хориҷӣ робитаи судманд бунёд гардид. Таҳияи Барномаи давлатии маърифат ва тарбияи экологии аҳолии Ҷумҳурии Тоҷикистон то соли 2000 ва дар давраи то соли 2010 дар давраи роҳбарии И. Давлатов ба вуқӯъ пайваст.

Фаъолияти илмӣ

Ба масоили мухталифи иқтисодӣ сару кор гирифта, талош варзидааст, ки дар ҳалли мушкилоти соҳа саҳм гузорад. Ковиши илмиаш хоса перомуни қонуниятҳои иқтисодии ташаккули комплекси ягонаи хоҷагии халқ, бисёр мушкилоти марбутаи минтақавӣ, вусъати назарияи интеграсияи иқтисодӣ ва ғайра сазовори ситоиш аст. Вусъати таҳқиқ дар ҳамаи корҳои илмиаш ҳувайдост.

Осор

• Интеграсияи байнирегионалӣ дар системаи иқтисодии сотсиализм. — Д., 1986;
• Иқтисоди бозаргонӣ. Китоби дарсӣ. — Д., 1994 (ҳаммуаллиф);
• Межрегиональная интеграция в экономической системе социализма. — Д., 1987;
• Таджикистана в общесоюзной кооперации труда. — Д., 1979;
• Экономика Таджикистана за годы Советской власти. — Д., 1987;
• Дар организми ягонаи хоҷагӣ. — Д., 1983;
• Иқтисодиёти Тоҷикистон дар солҳои Ҳокимияти Советӣ. — Д.,1987;
• Таҳлили ҳисоботи нави бухгалтерӣ. — Д., 1993.