Кабоби буғӣ

Кабоби буғӣ навъи маъмули хӯроки миллии тоҷикон буда, бо чунин тарз тайёр карда мешавад: Гӯшти лаҳми гӯсфандро 30-40-граммӣ реза намуда, бо пиёзи маҳин резакардашуда, намак, мурч, зира ва сирко меомезанду ба зарфи сирдор ё чинӣ андохта, 2-3 соат дар ҷои салқин мегузоранд. Ба болои лаълиҳои деги манту ҳамаи гӯштрезаҳоро гузошта, мисли манту дар буғи об мепазанд. Агар деги манту набошад, ба деги муқаррарӣ каме об андохта, ба даруни он чамбараи филизиро тавре мегузоранд, ки он ба об пурра нағӯтад. Баъд ба рӯи лаълии якчанд сӯрохидошта ё дигар зарфи тӯрдор гӯштрезаҳоро чида, сарпӯши дегро мепӯшанд ва обро меҷӯшонанд. Баъди пухтан кабобро ба табақ кашида, ба рӯяш кабудии реза ва сирко мепошанд. Ба 1кг гӯшти лаҳм 200 г пиёз, 1 бандча кабудӣ, 1 қошуқ сирко ва мувофиқи табъ намаку адвиёт лозим аст.

Нигаред

• Таомҳои миллии тоҷик
• Кабоб

Адабиёт

• Шовалиева М. История кулинарной культуры таджикского народа. – Душанбе: Дониш, 2015.
• Энсиклопедияи мухтасари рӯзгордорӣ. – Душанбе, 1988