Леонид Гайдай

Гайда́й Леони́д И́ович (30 январи 1923, Свободний, губернияи Амур — 19 ноябри 1993, Маскав) — коргардони филм, ҳунарпеша, филмноманависи рус. Артисти халқии ИҶШС (1989). Иштирокдори ҶБВ (1941–1945).

Леонид Гайдай
русӣ: Леонид Иович Гайдай
Ном ба ҳангоми таваллуд:	русӣ: Леонид Иович Гайдай
Таърихи таваллуд:	30 январ 1923(1923-01-30)
Зодгоҳ:	Свободний, Amur Governorate[d], ҶШФСР[d], ИҶШС
Таърихи даргузашт	19 ноябр 1993(1993-11-19) (70 сол)
Маҳалли марг:	Маскав, Русия
Шаҳрвандӣ:	ИҶШС  Русия
Касб:	коргардони филм, филмноманавис, ҳунарпеша, коргардон
Корнома:	1956 — 1992
Самт:	кумедӣ
Ҷоизаҳо:
IMDb:	ID 0301145
leonid-gaidai.ru/index.p…
Парвандаҳо дар Викианбор

Зиндагинома

Пас аз хатми Институти умумииттифоқии давлатии кинематография (бахши коргардонӣ) аз соли 1955 дар киностудияи «Мосфилм» кор кардааст. Нахустин бор ҳунари хешро дар филми «Домод аз он дунё» (1958) намоиш дод. Филмҳои дар жанри мазҳакаи ҳаҷвӣ бо усулҳои назарфиреб ва шигарфҳои кинои беовози солҳои 1920, инчунин тақлидҳои ҳаҷвомез дар мавзӯъҳои рӯз банаворгирифтааш Леонид Гайдайро шуҳратманд гардониданд.

Леонид Гайдай дар киноновеллаи «Саг Барбос ва кросси ғайриодӣ» (дар маҷмӯаи «Комилан ҷиддӣ», 1961) образҳои Балбес, Трус ва Бивалийро дар ҳамкорӣ бо ҳунарпешагони маъруф Ю. Никулин, Г. Витсин ва Е. Моргунов офарид, ки баъдан онҳо дар филмҳои дигари Леонид Гайдай («Шаробпазҳо», 1962; «Амалиёти Ы...», 1965; «Асири Қафқоз...», 1967) ва дигар коргардонҳо (Э. Рязанов, Е. Карслова) дар байни бинандагони сершумор маъруф гаштанд. Филмҳои таҳиякардаи Леонид Гайдай бо возеҳии манзараҳои кинематографӣ, шаклҳои фасеҳ ва ҳассосияти хислатҳои персонажҳо фарқ мекунанд. Бисёр филмҳои ӯ («Мардуми корчаллон», 1963; «Дасти алмосӣ», 1968, Ҷоизаи давлатии ИҶШС, 1970 ва ғайра) ба фонди тилоии кинои Иттиҳоди Шӯравӣ дохил шудаанд. Леонид Гайдай дар филмбардории осори И. Илф ва Е. Петров («12 курсӣ», 1971), М. Булгаков («Иван Василевич касби худро иваз мекунад», 1973), М. Зошенко («Ин ғайримумкин аст!», 1975) аз воситаҳои тасвири тақлиди масхараомез ва хандаовар истифода кардааст. Ӯ солҳои 1980 бештар барои киножурнали ҳаҷвии «Фитил» саҳнаҳо ба навор бардошт. Корҳои маъруфи ӯ дар охири умр: «Барои гӯгирд» (1982, аз рӯйи асари М. Лассиле), «Спортлото – 82» (1982), «Ҳавои хуб дар Дерибасковский...» (1992). Леонид Гайдай муаллифи сенарияи аксари филмҳои ба саҳна гузоштааш мебошад. Филмҳои Леонид Гайдай дар байни тамошобинони тоҷик маҳбубияти хосса доранд.

Сарчашма

• Гайдай Леонид Иович // Вичлас — Гӯянда. — Д. : СИЭМТ, 2015. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 4). — ISBN 978-99947-33-77-4.