Ховаршиносӣ

Ховаршиносӣ ё шарқшиносӣ, ориенталистика — риштае аз илм, ки дар бораи кишварҳои шарқӣ гуфтугӯ мекунад ва дар бораи шарқ қазоват карда ва воқеъиятҳои онро баррасию тафсир мекунад.

Дар дохили шарқшиносӣ бахшҳои минтақавӣ: мисршиносӣ, ошӯршиносӣ, сомишиносӣ, арабшиносӣ, эроншиносӣ, туркшиносӣ, хитойшиносӣ, муғулшиносӣ, ҳиндшиносӣ, ҷопоншиносӣ ва ғайра ба вуҷуд омадаанд. Қадимтарии бахши шарқшиносӣ эроншиносист, зеро юнониёни бостон нахустин бор давлати Эрони қадим ва баъдтар тамоми кишварҳои дар шарқи Юнон ҷой гирифтаро Шарқ ном додаанд. Аз ҳамин ҷо мафҳуми шарқшиносӣ пайдо шуда аст ва ҳудуди ҷуғрофии ин мафҳум таъйин гардидааст.