Абивард

(Тағйири масир аз Абевард)

Абивард, Абевард, Бовард — харобаи шаҳри қадима дар шимоли Хуросон. Дар доманаи кӯҳи Ҳазор­масҷид воқеъ аст. Абивард дар давраи Ашкониён бино ёфта, таърихнигорони румии қарни аввал онро ба номҳои «Apaortemon», «Apavortene» ва «Apa­vorktikene» зикр кардаанд.

Абивард дар даврони ҳукуматдории Сосониён, бахусус подшоҳии Яздигурди II ва Пирӯз равнақ дошта, аз марказҳои густариши масеҳият дар Хуросон маҳсуб мешуд. Ҳокимон ва фармонравоёни Абивардро қабл аз тавсеаи Ислом ба номи «Баҳман» ёд мекардаанд. Аз нимаи дуюми садаи VII Абивард тобеи хилофати араб гардид. Пас аз суқути Тоҳириён ва Саффориён Абивард тобеи давлатдории Сомониён шуд. Дар даврони давлатдории Сомониён амир Нӯҳ ибни Мансур Абивардро ба шоҳи Хоразм – Абуабдуллоҳ тақдим кард. Соли 1221 Абивардро муғулҳо забт карданд. Дар садаи XV ба империяи Темур ва аз с. 1593 ба ҳудуди давлати Шайбониён дохил буд. Аз с. 1600 тобеи Сафавиён. Абивард пас аз таъйини сарҳади Россия ва Эрон (1881) ба уезди Таҷани вил. Закаспияи Россия дохил шуд. Охири садаи XIX ба хароба табдил ёфт. Ҳоло дар наздикии Абивард деҳаи Пештоқ вуҷуд дорад.[1]

МанбаъВироиш

ЭзоҳВироиш

  1. Энсиклопедияи Миллии Тоҷик, Ҷилди 1. А-АСОС – Душанбе: Сарредаксияи илмии Энсиклопедияи Миллии Тоҷик, 2012.

СарчашмаВироиш