Бамако

Бамако
	Шаҳр
Бамако
	фр. Bamako
	Нишон
	12°38′45″ с. ш. 7°59′32″ з. д.HGЯO
Кишвар	Малӣ
Таърих ва ҷуғрофиё
Масоҳат	245 км²;
Баландии марказ	350 ± 1 м
Минтақаи замонӣ	UTC±00:00[d]
Аҳолӣ
Аҳолӣ	▲4 227 569 тан (2023);
Номи қавмӣ	бама́кӣ
	bamako.ml
	Бамако
	Парвандаҳо дар Викианбор

Бамако́ (фр. Bamako) — шаҳр, пойтахти Малӣ.

Ҷуғрофиё

Дар соҳили чапи дарёи Нигер, дар қисми ҷан. ғарбии мамлакат воқеъ гаштааст. Аҳолиаш 1,8 млн нафар (2012, бо атрофаш). Рамзи (герби) шаҳр тасвири се тимсоҳро дорад. Аҳолиаш аз ҳисоби муҳоҷирон босуръат меафзояд. Маркази бузургтарини нақлиётии мамлакат – р. о. Бамакоро бо Дакар ва бандари Куликорои дарёи Нигер мепайвандад. Фурудгоҳи байналмилалӣ дорад. Бамако солҳои охир ба чорроҳи Африқои Ғарбӣ – байни Сенегал, Кот д’Ивуар ва Гвинея табдил ёфтааст. Дар Бамако намояндагони гурӯҳҳои гуногуни этникӣ ва қабилаҳо зиндагӣ мекунанд.

Иқтисод

Бамако маркази иқтисодӣ, маданӣ ва тиҷоратию молиявии мамлакат буда, дар он корхонаҳои истеҳсоли мошинҳои кишоварзӣ, коркарди чарму пойафзор, маҳсулоти радиотехникӣ, селлюлоза ва коғаз; комБамако нассоҷӣ, ф-каҳои гӯгирд ва сигор фаъолият доранд. Қолибофӣ, кандакории чӯб, устухони фил ва диг. навъҳои касбу ҳунари халқӣ тараққӣ кардаанд. Дар Бамако савдои пахта, фундуқи заминӣ ва равғани рустанӣ васеъ ба роҳ монда шудааст. Бамако 2 осорхона, донишгоҳҳо, китобхонаҳо, мактабҳои махсус, коллеҷҳои тиббӣ, дандонпизишкӣ, муҳандисӣ, омӯзгорӣ, инчунин институтҳои таҳқиқоти илмӣ ва санъати тасвирӣ дорад. Дар асоси лоиҳаи меъморони шӯравӣ (А. Афанасев ва диг.) дар Бамако маҷмааи биноҳои варзишӣ ва муассисаҳои таълимӣ сохта шудаанд (1962–66).

Таърих

Бамако аз давраҳои қадим макони зисти одамон буда, дар садаҳои 11–15 яке аз марказҳои исломии Империяи Малӣ ба ҳисоб мерафт. Соли 1883 аз тарафи сипоҳиёни Фаронса забт гардид; аз соли 1908 бошишгоҳи идорӣ ва маъмурии мустамликадории Сенегали Боло ва Нигер, 1920–58 маркази маъмурии Судони Фаронсавӣ ва 1958–60 Ҷумҳурии Мухтори Судон, аз соли 1960 пойтахти Ҷумҳурии Малӣ ва маркази вил. ҳамном. Аз соли 1977 – воҳиди маъмурии мухтор – дистрикт. Ёдгорҳои таърихӣ ва меъмориаш – тасвирҳои рӯисангии давраи неолит (дар ғорҳои назди Бамако), масҷидҳо, калисоҳои католикӣ ва протестантӣ. Дар атрофаш Боғи миллии Бавле ҷой гирифтааст.

Эзоҳ

Сарчашма

Бамако // Асос — Боз. — Д. : СИЭМТ, 2013. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 2). — ISBN 978-99947-33-52-4.

Пойтахтҳои Африқо