Салоҳияти Раиси Маҷлиси намояндагон

Салоҳияти Раиси Маҷлиси намояндагон - Раиси Маҷлиси намояндагони Маҷлиси Олии ҶТ ҳамчун шахси олимансаби давлатӣ мувофиқи Конститутсия ва қонунҳои ҷумҳурӣ чунин салоҳият дорад:

1) ба таҳияи масъалаҳое, ки дар иҷлосияҳо баррасӣ мешаванд, роҳбарӣ менамояд;

2) дар иҷлосияи Маҷлиси намояндагон ва ҷаласаҳои Шӯрои он раисӣ мекунад;

3) номзадии муовинони Раиси Маҷлиси намояндагон, раисони кумитаҳо ва комиссияҳои Маҷлиси намояндагон ва номзадии роҳбари Дастгоҳи Маҷлиси намояндагонро ба Маҷлиси намояндагон пешниҳод менамояд;

4) қонун дар бораи буҷети давлатиро, ки Маҷлиси намояндагон қабул кардааст, барои имзо ва нашр ба Президенти Ҷумҳурии Тоҷикистон мефиристад;

5) қонунҳои қабулкардаи Маҷлиси намояндагонро барои ҷонибдорӣ ба Маҷлиси миллӣ мефиристад;

6) ба қарорҳои Маҷлиси намояндагон ва Шӯрои он имзо мегузорад;

7) Маҷлиси намояндагонро дар дохил ва хориҷи кишвар намояндагӣ мекунад;

8) ба созишномаҳои байнипарлумонии Маҷлиси намояндагон имзо мегузорад;

9) ба Дастгоҳи Маҷлиси намояндагон роҳбарӣ менамояд;

10) ваколатҳои дигареро, ки дар Конститутсия, қонунҳо ва Дастури Маҷлиси намояндагон муқаррар карда шудааст, амалӣ менамояд. Раиси Маҷлиси намояндагон дар доираи салоҳияти худ амр медиҳад.

Нигаред низ

Салоҳияти Раиси Маҷлиси миллӣ