Оқомираки Исфаҳонӣ
Оқомираки Исфаҳонӣ (эҳтимолан асри XVI, Исфаҳон — 1576) — мусаввир ва хаттоти форс-тоҷик.
| Таърихи таваллуд | эҳтимолан асри XVI |
|---|---|
| Зодгоҳ: | |
| Таърихи даргузашт | 1576 |
| Мамлакат: | |
 Парвандаҳо дар Викианбор | |
Зиндагинома
вироишСанъати хаттотӣ, наққошӣ, ҷадвалкашӣ ва манзаранигориро дар Исфаҳон, Табрез ва Ҳирот омӯхта, дар китобхонаҳои Табрезу Қазвин суратгарӣ кардааст. Дар ин бора дар «Туҳфаи Сомӣ»-и Соммирзо, «Ҳолоти ҳунарварон»-и Дустмуҳаммад ва «Таърихи оламорои Аббосӣ»-и Искандари Муншӣ маълумот оварда шудааст. Баъдтар дар назди Камолуддини Беҳзод маҳораташро такмил дода, аз шогирдони боистеъдоди ӯ шуд.
Оқомираки Исфаҳонӣ дар санъати манзаранигорӣ ва сиёҳқаламӣ сабки Беҳзодро давом дода, асарҳои зиёде эҷод кард. Панҷ тасвири устодонаи ӯ дар «Хамса»-и Низомӣ (солҳои 1539—1543, Табрез) оварда шудааст. Китобати ин асар ба қалими хаттот Шоҳмаҳмуди Нишопурӣ тааллуқ дошта, ҳоло дар Музеи Британия маҳфуз аст. Ин мусаввараҳо «Тоҷгузории Хусрави Парвиз», «Хусрав ва Шерӯя», «Маҷнун дар биёбон», «Анӯшервон дар харобот», «Бозгашти Шопур ба боргоҳи Хусрави Парвиз» ном дошта, аз ҷиҳати нигориш, истифодаю омезиши рангҳо, тасвири манзара басо ҷолиби диққатанд. Ороиши «Шоҳнома»-и Фирдавсӣ (ҳоло дар коллексияи хусусии А. Хотон, ИМА) низ ба қалами Оқомирак мансуб буда, мусаввараҳояш оддӣ, муҷаз ва дилангезанд.
Эзоҳ
вироишАдабиёт
вироиш- Оқомираки Исфаҳонӣ // Плешко — Сақил. — Д. : СИЭСТ, 1986. — (Энциклопедияи Советии Тоҷик : [дар 8 ҷ.] / сармуҳаррир М. Д. Диноршоев ; 1978—1988, ҷ. 6).