Реал Мадрид (бошгоҳи футбол)

Реал Мадрид
Номи пурра	Real Madrid Club de Fútbol
Лақаб	Los Blancos (Сафедҳо) Los Galácticos (Каҳкашониҳо) Los Merengues (Хомаиҳо) Los Vikingos (Викингҳо) La Casa Blanca (Кохи сафед)
Таъсис	06.03.1902
Майдон	«Сантияго Бернабеу», Мадрид
Ғунҷоиш	81 044
Президент	Флорентино Перес
Мураббӣ	Карло Анчелотти
Капитан	Начо
Рейтинг	ҷойи 5-ум дар раддабандии УЕФА
Сарпараст	Fly Emirates
Сайт	realmadrid.com
Мусобиқа	Ла Лига
2023/24	Қаҳрамон
Либоси асосӣ Либоси меҳмонӣ Либоси дуввум
2022/2023

«Реал Мадрид» (исп. Real Madrid Club de Fútbol, талаффузи испонӣ: [reˈal maˈðɾið ˈkluβ ðe ˈfuðβol]) — яке аз дурахшонтарин бошгоҳи футболи испонӣ, ки дар шаҳри Мадрид – пойтахти Испониё қарор дорад. Аз ҷониби ФИФА беҳтарин бошгоҳи футболи асри XX эътироф шудааст. «Реал Мадрид» яке аз се дастаест, ки дар қатори тимҳои «Барселона» ва «Атлетик Билбао» ҳеч гоҳ дивизиони олии Испониёро тарк накардааст. Яке аз бошгоҳҳои серҷомтарин дар футболи Испониё ба ҳисоб меравад. Дар тӯли фаъолият бошгоҳи «Реал Мадрид» 68 ҷоизаи миллиро соҳиб шудааст: 35 – қаҳрамони Ла Лига, 20 – Ҷоми Испониё, 12 – Суперҷоми Испониё ва 1 – Ҷоми Ла Лига. Аз рӯи шумораи ҷом ва гол дар Лигаи қаҳрамонҳои Урупо натиҷаи рекордӣ (14 – ҷом, 5 маротиба пайиҳам) дорад.

«Реал Мадрид» яке аз арзишмандтарин бошгоҳҳои варзишии ҷаҳон аст. Тибқи маълумоти «Deloitte», дар мавсими 2022/23, бошгоҳ бо даромади солонаи 713,8 миллион евро дар ҷои дуюм аст. Дар соли 2023 бо арзиши умумии 6,07 миллиард доллар арзишмандтарин бошгоҳи футбол эътироф гардид.

Таърих

Бунёд

Соли 1897 дастаи «Sky Football» таъсис дода шуд, ки нахустин нишона аз бошгоҳи мадридӣ аст. Вале расман санаи 6 марти соли 1902 ҳамчун рӯзи таъсисёбии бошгоҳи Madrid Football Club аз тарафи Хулиан Паласиос ва бародарон Падросҳо ба ҳисоб меравад. 29 июни соли 1920, шоҳи Испониё Алфонси XIII ба даста унвони Шоҳона (исп. Real)-ро гузошт. Аз ин рӯ номи муосири бошгоҳ Real Madrid аст.

«Madrid FC», ғолибони Ҷоми Испониё дар соли 1906

«Madrid FC», мавсими 1907/08. Росто (аз чап ба рост): Аспиунтса, Нейра, Парахес, Линдси (д), Ревулто ва Праст. Нишаста: Яртса, Новоа, Норманд, Берраондо ва Прада.

Аз ҳамон лаҳзаи таъсис, бошгоҳ шурӯъ ба иддаои раҳбарӣ дар футболи Испониё кард: аллакай дар соли 1903 ба финали Ҷоми Испониё роҳ ёфт ва дар он аз «Атлетик Билбао» мағлуб шуд. Чанд сол баъд ин Ҷоми ифтихорӣ, муддати тӯлонӣ ба пойтахт кӯчид: футболбозони «Реал Мадрид» чор бор пайиҳам ғолиби Ҷоми Испониё шуданд. Чемпионати Испониё шурӯъ аз фасли 1928/29 баргузор мешавад, то он дам тимҳои қавитаринро бар асоси минтақа муайян мекарданд. «Мадрид» (аз соли 1920 — «Реал Мадрид») дар ин муддат 16 бор дар минтақаи пойтахт музаффар шудааст.

«Реал Мадрид», ғолибони минтақаи пойтахт (феврали соли 1926)

Даврони авҷи бошгоҳ

Дар миёнаи солҳои 50-уми қарни гузашта, замоне ки тасмим ба таъсиси як созмони футболи қораӣ гирифта шуд, то мусобиқаҳои мунтазамро барои бошгоҳҳо ва тимҳои миллӣ фароҳам орад, «Реал Мадрид» дар Испониё садрнишини асосӣ набуд. Бо вуҷуди ин, маҳз «Реал Мадрид» дар мавсими 1954/55 қаҳрамони Лигбартари Испониё шуд ва аввалин роҳхатро миёни бошгоҳҳои испонӣ барои ширкат дар Ҷоми Қаҳрамонони Урупо мушарраф гашт. Аз он лаҳза, «Реал Мадрид» тӯли 5 сол рӯйиҳам ин ҷомро ба номи худ мӯҳр зад. Дастовардҳои тим дар арсаи байналмилалро пирӯзиҳо дар Ла Лига ҳамқадам буданд, онҳо аз соли 1954 то 1969 тавонистанд 12 маротиба қаҳрамони Лигбартар шаванд. Давоми зиёда аз даҳ сол тавре шуда буд, ки агар мадридиҳо имкони қаҳрамонӣ дар чемпионати дохилиро аз даст медоданд, ҳатман соҳиби Ҷоми қаҳрамонҳо мешуданд. Ҳамин тариқ, 15 сол пайиҳам дар бонуфузтарин мусобиқаи Урупо иштирок карданд ва бори аввал соли 1970 бинобар ишғоли ҷои 6-ум дар Ла Лига аз он бенасиб шуданд. Дар он даврони тиллоии «Реал Мадрид», Алфредо Ди Стефанои аргентинӣ (беҳтарин футболбози Урупо дар солҳои 1957 ва 1959), Раймон Копаи фаронсавӣ (ҷоизадори «Тӯби тиллоӣ» дар соли 1958), Ференс Пушкаши маҷорӣ (футболбози рақами дуи Урупо дар соли 1960), Франсиско Хенто - барандаи шашкаратаи Ҷоми қаҳрамонҳо бозигарони калидӣ буданд. Дар миёнаи солҳои 60-ум Хентои бузургро Хосе Сантамария, Амансио, Пиррӣ, Мигел Анхел ҳамроҳӣ мекарданд.

Ба рафтани футболбозони кӯҳантаҷриба, анъанаҳои фотеҳонаи бошгоҳи «Шоҳона» дар Урупо тадриҷан аз байн рафт. Ҳаводорони мадридӣ рушди навбатии тимро қариби бист сол мунтазир шуданд, замоне ки насли ҷадид бо раҳбарии Эмилио Бутрагенйо ва наздиктарин ҳамдастаҳояш Мишел, Ҳуго Санчез, «Маноло» Санчис, Мартин Васкес ва Мигел Пардеса омаданд. Онҳо ду маротиба қаҳрамони Ҷоми УЕФА ва панҷ маротиба дар чемпионати Испониё пайдарпай ғолиб шуданд.

Солҳои 1970-1990

Дар нимаи солҳои 70-ум «Реал Мадрид» дар мавсими 1973/1974 дар бозии финалӣ рақиби сарсахташ бошгоҳи «Барселона»-ро бо ҳисоби (4:0) мағлуб намуда, соҳиби Ҷоми Испониё шуд. Соли 1978 дастаи «Реал Мадрид» Улрих Штилике ва Хуаниторо харидорӣ кард. Бархилофи тафовут дар сабки бозӣ, онҳо барои солҳои тулонӣ қаҳрамони ҳаводорони мадридӣ хоҳанд монд. 4 июни соли 1980 мадридиҳо дар бозии ниҳоии Ҷоми мамлакат бар «Кастиля» бо ҳисоби 6:1 ғолиб шуданд. Соли баъд «Реал Мадрид» дубора бо расидан ба финали Ҷоми қаҳрамонҳо аз худ дар Урупо дарак дод. Дар ин набарди шадид бошгоҳи «Ливерпул» таҳти раҳбарии Боб Пейслӣ бар дастаи мадридӣ ва сармураббӣ Вуядин Бошков бо ҳисоби минималии 1:0 зафар ёфт. Голи ягонаи бозиро дар дақиқаи 82-юм ҳимоягари хатти чапи мерсисайдиҳо Алан Кеннедӣ зад. Алфредо Ди Стефано моҳи декабри соли 1983 ба вазифаи сармураббии «Реал Мадрид» таъйин шуда, бозигарон Мартин Васкес, Мишел, «Маноло» Санчис ва Эмилио Бутрагенйоро аз ҳайати ҷавонон ба дастаи асосӣ шомил намуд. Эмилио Бутрагенйои ҷавон дар бозии якуми худ бо пироҳани бошгоҳи «Шоҳона» дар муқобили «Кадис», ба задани ду гол даст ёфт ва ба мадридиҳо ғалаба овард. Дар пайи чунин талошҳо, ҳаводорон ӯро хеле зуд ҳамчун яке аз рамзҳои даста пазируфтанд.

24 майи соли 1985 Рамон Мендоса курсии президентии бошгоҳи «Реал Мадрид»-ро ишғол намуда ба беҳтар шудани натиҷаҳои даста саҳм гузошт. Дар солҳои 1985 ва 1986 бо мағлуб намудани бошгоҳҳои «Видеотон» ва «Кёлн» дар бозиҳои финалӣ, мадридиҳо ҷоизадори 2 Ҷоми УЕФА шуданд. Он солҳо футболбозони «Реал Мадрид» дар варзишгоҳи худ бо илҳоми хос майдондорӣ мекарданд: ба назар чунин менамуд, ки баъди бохт бо ҳар ҳисобе, онҳо натиҷаи лозимияшонро метавонанд бозпас гиранд. Боре барояшон муяссар шуд, ки кори куллан боварнакарданиро анҷом диҳанд: бозии аввалро дар шаҳри Дӯсселдорф бар «Боруссия М» бо ҳисоби 1:5 бохта, дар бозии ҷавобӣ дар «Сантияго Бернабеу» чор туби беҷавоб зада, ба даври дигар баромаданд.

Баъди чанд мавсими нисбатан номуваффақ вазифаи сармураббии «Реал Мадрид»-ро Хорхе Валдано, ки то он лаҳза дар бошгоҳи «Тенерифе» кори пурсамаре анҷом дода буд, ба ӯҳда гирифт. Ӯ ба Редондо, Лаудруп, Амависка ва Кике Флорес мавқеи доимӣ дар ҳайати асосиро бовар намуд.

8 январи соли 1995 шогирдони Валдано рақибони асосии худ «Барселона»-ро бо ҳисоби бузурги 5:0 мағлуб карда, дар охир мақоми аввали Ла Лигаро соҳиб шуданд. Аммо, мавсими оянда нокомии бошгоҳи «Реал Мадрид» дар Ла Лига ва Лигаи Қаҳрамонҳо сабаби барканор шудани Валдано ва моҳи июли соли 1996 таъйин шудани мураббии машҳури итолиёвӣ Фабио Капелло гашт. Ӯ таркиби тимро ба таври назаррас навсозӣ намуда, ба он Кларенс Зеедорф, Предраг Миятович ва Роберто Карлосро шомил кард. Барои дастаи Капелло як мавсим кофӣ буд, то қаҳрамон шавад. Моҳи майи соли 1998 «Реал Мадрид» таҳти идораи сармураббӣ Юпп Ҳайнкес дар бозии ҳалкунанда бар Ювентус (1:0) ғолиб омада, бори ҳафтум Лигаи Қаҳрамонҳоро ба даст овард. «Реал» бо мураббии дигар Гуус Ҳиддинк пас аз чанд моҳ, бошгоҳи «Васко да Гама»-ро дар бозии ниҳоӣ шикаст дода, Ҷоми байниқораиро низ ба Мадрид интиқол дод.

Пас аз бебарории мавсими 1998/1999, роҳбарияти «Реал Мадрид» тасмим гирифт вазифаи сармураббигариро ба Висенте Дел Боске супорад ва хато накард: даста дар бозии финалӣ бар «Валенсия» (3:0) пирӯз шуда, бори ҳаштум Лигаи Қаҳрамонҳоро ба даст овард. Раул голи сеюми бозиро зада, дар қатори Ривалдо ва Марио Жардел бо 10 гол дар қатори голзанҳои беҳтарини Лигаи Қаҳрамонҳо номи худро сабт кард. Соли 2001, «Реал Мадрид» 28-ум унвони қаҳрамонии Испониёро ноил шуд.

Президентии Флорентино Перес

Флорентино Перес

Бо интихоб шудан ба мансаби президентӣ Флорентино Переси ҳадафманд тасмим гирифт, ки ҳама футболбозони беҳтарини сайёраро дар «Реал Мадрид» ҷамъ оварад. Перес фаъолияти худро бо хариди Луиш Фигуи портуғолӣ аз бошгоҳи «Барселона» ба маблағи рекордии 71 миллион евро оғоз кард. Як сол баъд Зайниддин Зидон ба сафи «Реал Мадрид» пайваст, ки барои ӯ ба «Ювентус» боз ҳам зиёдтар - 75 миллион евро пардохт кард. Пас аз як сол, Роналдоро аз бошгоҳи «Интер», тобистони соли 2003 - Дэвид Бекҳэмро аз «Манчестер Юнайтед», ва соли 2004 ҳамлагари бошгоҳи Ливерпул Майкл Овенро ба даста овард. Ҳамин тариқ, дар мавсими 2004/05 чаҳор бозигар, ки ҷоизаи «Тӯби тиллоӣ» доштанд: Роналдо (беҳтарин футболбози ҷаҳон дар солҳои 1997 ва 2002), Зидон (1998), Фигу (2000), Овен (2001) якҷоя дар ҳайати тими «Шоҳона» бозӣ карданд. Ин ҷамъи ситораҳои футбол ба номи «Галактикос» маъруф шуд. Дар тӯли зиёда аз панҷ соли ҳукмронии Перес (моҳи феврали соли 2006 истеъфо дод) «Реал Мадрид» ду маротиба қаҳрамони Испониё ва як маротиба ғолиби Лигаи Қаҳрамонҳо (дар мавсими 2001/02) шуд.

Президентии Рамон Калдерон

Бозигарони «Реал Мадрид» дар ҳоли ҷашнгирии гол ба дарвозаи бошгоҳи «Бавария», соли 2007

Пас аз Флорентино Перес, Рамон Калдерон президенти «Реал Мадрид» интихоб шуд, ки сабки роҳбарии ӯ аз Перес хеле фарқ мекард. Калдерон ҳадафи харидани беҳтарин футболбозонро надошт. Пеш аз ҳама, президенти нав ба тозакунӣ ва ҷавонсозии таркиби даста, ки он замон рӯзҳои сахтеро аз сар мегузаронд, пардохт. Дар давраи ҳукмронии Калдерон, Бекҳэм, Роберто Карлос, Робиню ва Роналдо яъне тамоми «мерос»-и Перес фурӯхта шуданд. Дар ивази ин Калдерон бозигарони машҳур Ван Нистелрой, Каннаваро, Ҳигуаин, Снейдер ва Пеперо ба тими «Шоҳона» овард. Вале тағйироти асосӣ иваз намудани сармураббӣ буд. Фабио Капелло, мутахассиси қавӣ ва мустақил, дубора ба даста баргардонда шуд. Мавсими аввал «Каҳкашониҳо» дар Ла Лига қаҳрамон шуданд, аммо дар даври 1/8-ниҳоии Лигаи Қаҳрамонҳо аз дастаи олмонии «Бавария» дар маҷмӯъ (ҳисоби умумӣ 4:4) шикаст хӯрданд. Дар поёни фасли нахуст сарфи назар аз унвони қаҳрамони Испониё, ки аввалин бор дар тӯли чор соли охир буд, роҳбарияти «Реал Мадрид» мураббии итолиёвиро ба сабаби ҷорӣ кардани "бозии дилгиркунандаи даставӣ" аз кор озод кард. Мансаби сармураббигарӣ ба мутахассиси олмонӣ ва мураббии «Хетафе» Бернд Шустер вогузошта шуд. Бо мураббии олмонӣ, «сафедпӯшҳо» Суперҷом ва қаҳрамонии Испониёро пеш аз мӯҳлат ба даст оварданд. Аз ин рӯ, дар Эл-Класико (ҳисоб – 4:1), ки дар варзишгоҳи «Сантияго Бернабеу» баргузор шуд, футболбозони «Барселона» тибқи анъанаи испонӣ “роҳрави қаҳрамонӣ” ташкил карда, мадридиҳоро бо кафкӯбӣ истиқбол намуданд. Бо вуҷуди ин, дар Лигаи Қаҳрамонҳо пешравӣ ба чашм намерасид. Дар даври 1/8-ниҳоӣ «Реал Мадрид»-ро бошгоҳи «Рум»-и итолиёвӣ (ҳисоби умумӣ – 2:4) аз мусобиқот берун кард. Новобаста аз усули хос доштанаш Рамон Калдерон дар барномаи пешазинтихоботии дуюм қавл дод, ки Криштиану Роналду, Кака ва Фабрегасро барои даста харидорӣ хоҳад кард. Соли 2009 Рамон Калдерон ба далели моҷарои тақаллуб дар интихоботи соли 2006 истеъфо дод. Дар тӯли дуюним соли президентии Калдерон «Реал Мадрид» ду маротиба пайиҳам қаҳрамони Испониё ва як маротиба Суперҷоми Испониёро соҳиб шуд.

Бозгашти дубораи Перес

Қабл аз интихобот ҳама рақибон номзадии худро пас гирифтанд ва Флорентино Перес 1-уми июн соли 2009, бидуни овоздиҳӣ боз президенти «Реал Мадрид» шуд. Пас аз бозгашт Перес ба ташкил кардани “галактикос”-и комилан нав шурӯъ кард. Ибтидо, дар даста тағйироти раҳбарӣ сурат гирифт: Зайниддин Зидон бозикуни собиқи «Реал Мадрид» мушовири президент шуд. Рӯзи 9-уми июн пас аз музокироти тӯлонӣ ва сару садоҳои мухталиф миёнмайдони дастаи «Милан»-и Итолиё ва тими миллии Брозил Кака ба маблағи 68 миллион евро ба «Реал Мадрид» гузашт. Ӯ бо даста қарордоди шашсола имзо кард ва пас аз бозгашти Перес ситораи аввалин шуд. Пас аз он бо беҳтарин бозигари ҷаҳон дар соли 2008 Криштиану Роналду, ки дер боз орзуи пӯшидани пироҳани “бланкос”-ро дошт, шартнома ба имзо расид. Перес барои ситораи портуғолӣ 80 миллион фунт стерлинг (93,4 миллион евро) пардохт кард. Рӯзҳои 25-уми июн ва 1-уми июл, Раул Албиол аз «Валенсия» ва Карим Бензема аз «Олимпик Лион» ба арзиши 15 миллион ва 35 миллион евро ба «Реал Мадрид» гузариш намуданд. Миёнмайдон Эстебан Гранеро аз бошгоҳи «Хетафе», муҳофиз Алваро Арбелоа ва миёнмайдони такягоҳӣ Шаби Алонсо ҳарду аз бошгоҳи «Ливерпул» ба ҳайати тими «Реал Мадрид» ҳамроҳ шуданд. Мадридиҳо барои интиқоли Арбелоа 4 миллион евро ва барои Алонсо 30 миллион фунт стерлинг харҷ намуданд .

Сарфи назар аз харидҳои муҳим, даста он мавсим натавонист ҳадди ақалл ҷомеро соҳиб шавад. Дар чемпионати Испониё «Реал» баъд аз тими «Барселона» дар ҷои дуюм қарор гирифт. Бошгоҳ дар Лигаи Қаҳрамонҳо низ шаҳди нокомӣ чашид ва шашумин бор пайиҳам дар марҳилаи 1/8-ниҳоӣ аз мусобиқот берун шуд. Дар Ҷоми Испониё бошад, даста дар марҳилаи аввал аз дастаи дивизиони сеюми Испониё «Алкоркон» шикаст хӯрда аз мубориза хориҷ шуд. Дар поёни мавсим сармураббӣ Мануел Пеллегрини барои натиҷаҳои ғайриқаноатбахш аз мақомаш барканор шуд. Ҷозе Моуринё ки бо бошгоҳи итолиёвии «Интер» «ҳет-трики тиллоӣ» анҷом дода буд, пас аз гуфтушунидҳои кӯтоҳ сармураббии «Реал Мадрид» таъйин карда шуд.

Гузариши тобистона дар ҳадди соли пеш пуровоза набуд, ҳарчанд бидуни одатҳои маъмулӣ нагузашт. Барои харидорӣ беш аз 70 миллион евро харҷ шуд ва дастаро ботаҷрибатарин муҳофизатгари портуғолӣ Рикарду Карвалё, миёнмайдонҳои ҷавони испонӣ - Педро Леон ва Серхио Каналес, намояндагони насли нави футболи олмонӣ - Сами Хедира ва Масъуд Озил, инчунин ҳуҷумкори аргентинӣ Анхел Ди Мария пурра карданд.

«Реал Мадрид» мавсими 2010/11-ро хеле бомуваффақият оғоз кард ва нишон дод, ки омодаи мубориза барои унвони қаҳрамонӣ аст, вале дар ниҳоят дар ҷои дуюм қарор гирифт. Дар Ҷоми Испониё корҳо хеле бобарор буданд. Даста дилпурона ба финал баромад ва он ҷо онҳоро рақиби азалӣ «Барселона» интизор буд. «Реал Мадрид» дар бозии барои ҳарду даста душвор тавонист пирӯз шавад: Голи Криштиану Роналду, ки дар вақти изофӣ зада шуд, ҷоми деринтизорро барои даста ба армуғон овард. Дар Лигаи Қаҳрамонҳо «Реал Мадрид» ба даври ниманиҳоӣ роҳ ёфт, ки дар як бозии пуртаниш ва баҳсбарангези доварон дар ҷамъи ду бозӣ аз «Барселона» шикаст хӯрд.

Тобистони соли 2011, бошгоҳ барои таҳкими ҳайат ҳимоятгарон Рафаел Варан, Фабио Коентрао, миёнмайдонҳо Нури Шоҳин, Ҳамид Алтинтоп ва ҳамлагар Хосе Калехонро ба даста овард. Илова бар ин, бошгоҳ 22-юми июн расман аз васеъ кардани салоҳиятҳои сармураббии даста ва вогузор кардани вазифаи мудири варзишӣ ба Ҷозе Моуринё хабар дод. Ба ин тартиб «Реал Мадрид» ба модели инглисии идоракунии даста гузашт.

Шогирдони Моуринё дар мавсими 2011/12 дастоварди «Барселона»-ро, ки дар мавсими 2009/10 – 99 хол дар як фасл буд, бо касби 100 имтиёз шикаста, рекорди наве дар Ла Лига сабт карданд. Илова бар ин, «Реал Мадрид» аввалин тиме гардид, ки дар 32 бозии як мавсим пирӯз шуда, аз рӯи шумораи голҳо (121 гол) дар як фасл рекорд гузошт.

Тобистони соли 2012 миёнмайдонҳои «Челси» Майкл Эссиен ва «Тоттенҳем» Лука Модрич ба Мадрид пайвастанд. Аввалӣ ба тарзи иҷора ва дуввумӣ харидорӣ шуд. Аммо як қатор бозикунҳо дастаро тарк карданд: Фернандо Гаго ва Серхио Каналес ба «Валенсия», Ҳамид Алтинтоп ба «Галатасарой», Эстебан Гранеро ба «Квинз Парк Рейнҷерс», Лассана Диарра ба «Анжи», Ройстон Дренте ба «Алания», Дани Карвахал ба «Байер 04» ва ба тарзи иҷоравӣ бошад Нури Шоҳин нахуст ба «Ливерпул» ва зимистони соли 2012 ба «Боруссия Дортмунд». Зимистон дарвозабон Диего Лопес, ки қаблан дар бошгоҳҳои «Вийярреал» ва «Севийя» ҳунарнамоӣ мекард, ба даста баргашт.

«Каҳкашониҳо» мавсими 2012/2013-ро бо шикаст додани дастаи «Барселона» (ҳисоби умумӣ 4:4) дар Суперҷоми Испониё оғоз карданд. Лигбартари Испониёро бошад, дар зинаи дуюм ҷамъбаст карданд. Дар Ҷоми Испониё «Реал Мадрид» ба финал расид ва «Барселона»-ро дар ин масир аз мусобиқа берун кард, вале бозии финалиро бар «Атлетико Мадрид» (1:2) бохт. Дар Лигаи Қаҳрамонҳо «мадридиҳо» ҳунарнамоиро дар даври нимниҳоии мусобиқа бо шикаст хӯрдан аз тими «Боруссия Дортмунд» (дар маҷмӯъ 3:4) ба поён расонд.

20–уми май мушаххас шуд, ки Ҷозе Моуринё дастаро тарк мекунад. Рӯзи 2–юми июн Флорентино Перес бори дигар президенти «Реал Мадрид» интихоб шуд. 27–уми июн Карло Анчелотти ҳамчун сармураббии бошгоҳ муаррифӣ шуд. Ёварони сармураббӣ Зайниддин Зидони фаронсавӣ ва Пол Клементи инглис таъйин шуданд.

«Десима» ва требли урупоӣ

Тобистони соли 2013 як қатор миёнмайдонҳо харидорӣ шуданд: ситораи «Тоттенҳем» Гарет Бейл, Каземиро аз «Сан-Паулу», Асиер Иллараменди аз «Реал Сосиедад» ва Иско аз «Малага». Инчунин, Дани Карвахал пас аз гузаронидани мавсими иҷорӣ дар «Байер 04» ба даста баргашт. Футболбози рус Денис Черишев ва ҳамлагари испонӣ Хесе аз дастаи ҷавонони «Кастиля» ба ҳайати дастаи асосӣ интиқол ёфтанд. Бо вуҷуди ин, як қатор бозигарон дастаро тарк карданд: ҳимоятгар Раул Албиол, ҳамлагарон Гонсало Ҳигуаин ва Хосе Калехон ба «Наполи», миёнмайдонҳо Масъуд Озил ба «Арсенал», Кака ба «Милан» ва Педро Леон ба дастаи «Хетафе». Ҳамчун бозигарони озод, Рикарду Карвалё ба «Монако» ва Антонио Адан ба «Каляри» гузаштанд. Майкл Эссиен баъди анҷоми мавсим ба «Челси» баргашт ва дар авоили сентябр Денис Черишев ба тими «Вийярреал» ба иҷора дода шуд.

16-уми апрели соли 2014, «сафедпӯшҳо» бо шикаст додани «Барселона» дар финал бо ҳисоби 2:1, Ҷоми Испониёро ба даст оварданд. Голи ҳалкунандаро Гарет Бейл ба самар расонд.

Баъд аз 12 соли интизорӣ, 24–уми майи соли 2014, «мадридиҳо» дар финал бар «Атлетико Мадрид» бо ҳисоби 4:1 зафар ёфта, даҳумин ҷоми Лигаи Қаҳрамонҳоро аз худ намуданд.

Пас аз пирӯзӣ дар Лигаи Қаҳрамонҳо дар соли 2014, «Реал Мадрид» бо Кейлор Навас, Тони Кроос ва Хамес Родригес шартнома баст. Бошгоҳ соли 2014 дар бозии Суперҷоми УЕФА бар «Севийя» пирӯз шуд. Ин 79-умин ҷоиза дар таърихи даста гардид. Дар охирин ҳафтаи равзанаи интиқоли тобистонаи соли 2014 «Реал Мадрид» бозигарони калидӣ Шаби Алонсоро ба «Бавария» ва Анхел Ди Марияро ба «Манчестер Юнайтед» фурӯхт. Ин тасмими бошгоҳ ба баҳсу мунозираҳои зиёд печид. Криштиану Роналду изҳор дошт: «Агар ман масъул мебудам, шояд корҳоро ба таври дигар анҷом медодам» ва Карло Анчелотти иқрор шуд, ки «Мо корҳоро бояд дубора аз сифр шурӯъ кунем.»

Пас аз оғози нобарори мавсими 2014/15, «Реал Мадрид» силсилаи 22 пирӯзии пайиҳамро ба қайд гирифт, ки зафарият бар «Барселона» ва «Ливерпул» шомили он рекорд буд. Ин натиҷаи назаррас, рекорди пешинаи Испониё - 18 ғалабаи пайдарпайи «Барселона» таҳти роҳбарии Франк Райкаард дар мавсими 2005/06-ро зад. Силсилаи рекордӣ дар аввалин бозии соли 2015 бо мағлубият аз тими «Валенсия» ба итмом расид. Барои такрор кардани рекорди ҷаҳонӣ (24 ғалабаи пайдарпай) ба даста ду ғалаба нарасид. Рӯзи 20-уми декабр «Реал Мадрид» дар финал бар дастаи «Сан-Лоренсо»-и аргентинӣ ғолиб омада, Ҷоми бошгоҳҳои ҷаҳонро соҳиб шуд. «Каҳкашониҳо» дар даври ниманиҳоии Лигаи Қаҳрамонҳо аз «Ювентус» мағлуб шуда, муваффақияти соли гузаштаро такрор карда натавонистанд. Дар Ҷоми Испониё низ мувоҷеҳи шикаст шуданд, инчунин дар Ла Лига бо касби ду имтиёз кам аз «Барселона» мақоми дуюмро аз худ карданд. 25-уми майи соли 2015 Карло Анчелотти аз вазифаи сармураббӣ бекор карда шуд.

3-юми июни соли 2015 Рафаэл Бенитес сармураббии ҷадиди «Реал Мадрид» эълон шуд ва ӯ бо даста қарордоди дусола имзо намуд. «Реал»-и Мадрид бидуни мағлубият ба пеш мерафт, то дар бозии даври 11-уми чемпионати Испониё аз бошгоҳи «Севийя» бо ҳисоби 2:3 шикаст хӯрд. Ба дунболи он бохти хонагии 0:4 аз «Барселона» дар «Эл-Классико»-и фасли якум рух дод. Дар дидори аввали 1/16-ниҳоии Ҷоми Испониё «Реал Мадрид» дар сафар дастаи «Кадис»-ро бо ҳисоби 1:3 мағлуб намуд. Бинобар сабаби ба майдон баромадани Денис Черишеви мардудшуда дар ҳайати мадридиҳо, бозии баргашт лағв шуд ва «Реал Мадрид» аз идомаи мусобиқа маҳрум гашт. Бенитес 4-уми январи соли 2016 бо иттиҳоми надоштани маҳбубият миёни ҳаводорон, норизоятии бозигарон ва нотавонӣ дар касби натиҷаҳои арзанда зидди тимҳои қавӣ аз вазифааш барканор карда шуд.

4-уми январи соли 2016 дар баробари барканории Бенитес, хабари ба ҳайси сармураббӣ таъйин шудани Зайниддин Зидон эълон шуд. Зери роҳбарии Зидон, «Реал Мадрид» мавсими 2015/16-ро дар Ла Лига бо як хол камтар аз «Барселона» дар ҷои дуюм ба анҷом расонд. Рӯзи 28-уми май дар шаҳри Милан, «Реал Мадрид» дар финал боз ҳам бо «Атлетико Мадрид» андари майдон шуд. Қисмати асосии бозӣ бо ҳисоби 1:1 ба анҷом расид ва дар силсилазарбаҳои пеналтӣ (5:3) бахт боз ҳам ба рӯи тими «Шоҳона» хандид. Бо ба даст овардани 11-умин унвони қаҳрамонӣ дар Лигаи Қаҳрамонҳо, мадридиҳо рекорди худро барои бештарин пирӯзӣ дар ин мусобиқот афзоиш доданд. Ин дастовард дар таърихи бошгоҳ номи “Ундесима”-ро гирифт.

Шодии мухлисони «Реал Мадрид» дар майдони Пуэрта-дел-Соли шаҳри Мадрид

Зидон ба ҳайси сармураббии «Реал Мадрид» аввалин мавсими пурраи худро бо пирӯзии Суперҷоми УЕФА дар соли 2016 оғоз кард. То 10-уми декабри соли 2016 мадридиҳо 35 бозиро пайиҳам бидуни мағлубият паси сар карда, рекорди нави бошгоҳро гузоштанд. Санаи 18-уми декабри соли 2016 дар бозии финалӣ, «Реал Мадрид» бар дастаи «Кашима Антлерс»-и Ҷопон бо ҳисоби 4:2 ғолиб омада, Ҷоми бошгоҳҳои ҷаҳонро ба даст овард. Пас аз мусовӣ бо «Севийя» (3:3) дар Ҷоми Испониё, 12-уми январи соли 2017, силсилаи шикастнопазирии мадридиҳо ба 40 бозӣ тӯл кашид ва рекорди испониёии бошгоҳи «Барселона» бо 39 бозӣ бидуни мағлубият дар тамоми рақобатҳои фасли қабл шикаста шуд. Се рӯз пас дар майдони худ бошгоҳи «Севийя» бо ҳисоби (2:1) тими «Шоҳона»-ро мағлуб намуда, ба силсилаи шикастнопазирии онҳо нуқта гузошт. Моҳи майи соли 2017, «Реал Мадрид» 33-юмин маротиба дар таърих (бори аввал дар панҷ соли охир) ғолиби Ла Лига шуд.

Перес, Зидон ва бозигарони «Реал» дар канори шаҳрдори Мадрид Мануела Кармена баъди пирӯзии 33-юм дар Ла Лига, моҳи майи соли 2017.

3-юми июни соли 2017, бошгоҳ бо шикаст додани «Ювентус»-и туринӣ (4:1) дар финал унвони Лигаи Қаҳрамонҳоро ҳифз карда дар таърихи муосир нахустин дастае гардид, ки дар ин мусобиқа пайиҳам ду маротиба пирӯз шуд. Ин сеюмин ҷом дар чор соли охир ва дар умум 12-ум ҷоми «Реал Мадрид» буд, ки ҳамчун рекорд дар таърихи мусобиқа ба қайд гирифта шуд. Ин дастовард бо номи “Дуодесима” низ маълум аст. Дар мавсими 2016/17, «Реал Мадрид» дар таърихи худ шумораи бештари ҷомҳоро дар як мавсим касб кард.

«Реал Мадрид» бо бартарии 2:1 бар «Манчестер Юнайтед» ғолиби Суперҷоми УЕФА 2017 шуд. 5 рӯз баъд, «Реал Мадрид» дар якумин дидори Суперҷоми Испониё дар «Камп Ноу» Барсаро 1:3 шикаст дод ва сипас дар бозии баргашт 2:0 пирӯз шуда, ба силсилаи 24 голи пайиҳами «Барселона» ба дарвозаи хомаиҳоро хотима бахшид. Санаи 16-уми декабри соли 2017, дар бозии ниҳоӣ «Реал Мадрид» дастаи «Гремио»-и Брозилро бо ҳисоби 1:0 шикаст дода, қаҳрамони Ҷоми бошгоҳҳои ҷаҳон шуд ва аввалин бошгоҳе гардид, ки ду бор пайиҳам ҷоми ин мусобиқотро ба даст овард. Худи ҳамон мавсим, «Реал Мадрид» бо «Ливерпул» ба даври ниҳоии Лигаи Қаҳрамонҳо расиданд. Ин бозӣ дар варзишгоҳи «Олимпӣ»-и шаҳри Киев баргузор шуда, бо ҷароҳат бардоштану ашкҳои Муҳаммад Салоҳ ва Дани Карвахал, иштибоҳҳои дарвозабони «Ливерпул» Лорис Кариус ва голҳои зебои Гарет Бейлу Карим Бензема дар хотираи ҳаводорони футбол нақш баст. Ин дидорро «Реал Мадрид» (3:1) ба нафъи хеш хотима дод ва унвони ғолиби Лигаи Қаҳрамонҳоро нигоҳ дошта, аввалин дастае гардид, ки аз рӯзи таъсис дар ин мусобиқа пайиҳам се маротиба пирӯз шуд. Инчунин пас аз солҳои 70-ум баъд аз «Бавария» якумин бошгоҳе шуд, ки дар се мусобиқаи пайдарпайи урупоӣ ғолиб омад.

Реал баъди истеъфои Зидон ва фурӯши Роналду

Рӯзи 31-уми май, панҷ рӯз пас аз пирӯзӣ дар финал, Зидон аз сармураббигарии «Реал Мадрид» истеъфо дод ва сабаби рафтанашро “ниёз ба тағйир” унвон кард.

«Реал Мадрид» дар соли 2017, ҷоми «Нӯҳ арзиш», ҷоиза аз барномаи иҷтимоии байналмилалии кӯдакон «Футбол барои дӯстӣ»-ро дарёфт кард. Ҳар сол ҷом барои сатҳи баланди масъулияти иҷтимоии бошгоҳ ва ӯҳдадориҳои бештар ба арзишҳои лоиҳа (дӯстӣ, баробарӣ, адолат, солимӣ, сулҳ, садоқат, ғолибият, оинҳо ва шараф) дода мешавад. Ғолибро кӯдакони иштироккунандаи чорабиниҳои ниҳоии барномаи F4F аз 64 кишвари ҷаҳон интихоб карданд.

«Реал Мадрид» 12–уми июни соли 2018 расман эълон кард, ки Хулен Лопетеги сармураббии тими миллии Испониё баъди анҷоми мусобиқаи Ҷоми ҷаҳонии футбол 2018 вазифаи сармураббигарии бошгоҳро ба ӯҳда мегирад. Вале як рӯз пеш аз оғози мусобиқот Лопетеги барои бидуни огоҳӣ музокира кардан бо бошгоҳ, аз мунтахаби Испониё барканор шуд. Тобистони соли 2018 дар пайи таҷдиди ҳайат, устураи бошгоҳ Криштиану Роналду ба арзиши 112 миллион евро ба тими «Ювентус» гузашт. Пас аз як қатор бозиҳои заъиф ва мағлубиятҳои даста, Лопетеги аз кор озод карда шуда, мураббии онвақтаи «Реал Мадрид Кастийя» Сантияго Солари ҷойгузини ӯ таъйин гашт. 22-юми декабри соли 2018 «Реал Мадрид» дар финал бар дастаи «Ал-Айн»-и Аморати Муттаҳидаи Араб бо ҳисоби 4:1 ғалаба карда, пайиҳам сеюмин Ҷоми бошгоҳҳои ҷаҳонро ба даст овард. Пас аз ин пирӯзӣ «Реал Мадрид» бо чаҳор унвон ба рекорддори мутлақи мусобиқа табдил ёфт. Бошгоҳ дар маҷмӯъ ҳафт маротиба қаҳрамони ҷаҳон дониста мешавад, зеро ФИФА Ҷоми байниқораиро ҳамчун пешгузаштаи Ҷоми бошгоҳҳои ҷаҳон эътироф мекунад. «Реал Мадрид» инчунин шумораи рекорди пайдарпай дар ин мусобиқаро афзоиш дод. 11-уми марти соли 2019 «Реал Мадрид» дубора Зидонро сармураббии бошгоҳ таъйин кард.

12-уми январи соли 2020 «Реал Мадрид» дар силсилаи пеналтӣ «Атлетико Мадрид»-ро шикаст дод ва ёздаҳумин унвони қаҳрамонии Суперҷоми Испониёро касб кард. Моҳи марти соли 2020 бар асари пандемияи COVID-19 таътил эълон шуд ва дар моҳи июн бозиҳо дубора шурӯъ шуданд. Бозигарони бошгоҳи «Шоҳона» баъди баргашт 10 ғалабаи пайиҳам ба даст оварда унвони 34-ум қаҳрамонӣ дар Ла Лигаро соҳиб шуданд.

Намодҳои бошгоҳ

Ангораҳо

Таърихи ангораҳои бошгоҳ

• 
  Нахустин ангораи бошгоҳ (1902—1908)
• 
  (1908—1920)
• 
  (1931—1941)
• (1941—2001)
  (1941—2001)

Пироҳанҳои даста дар мавсимҳои гуногун

Хонагӣ

1902

1911

1914

1925

1926

1931

1941

1954

1955

1980

1982

1984

1986

1989

1990

1992

1993

1994

1996

1997

1998

2000

2001

2002

2003

2004

2005

2006

2007

2008

2009

2010

2011

2012

2013

2014

2015-2016

2016-2017

2017-2018

2019

2020

2021

2022

Меҳмонӣ

1980	1982	1984	1986	1989	1992/93	1993/94	1994/95	1996/97	1997/98	1998/99
1999/2001	2001/02	2002/03	2003/04	2004/05	2005/06	2006/07	2007/08	2008/09	2009/10	2010/11
2011/12	2012/13	2013/14	2014/15	2015/16	2016/17	2017/18	2018/19	2019/20	2020/21	2021/22
2022/23

Эҳтиётӣ

1998/99	1999/2001	2001/02	2002/03	2003/04	2004/05	2005/06	2006/07	2007/08	2008/09	2009/10
2010/2011	2011/12	2012/13	2013/14	2014/15	2015/16	2016/17	2017/18	2018/19	2019/20	2020/21
2021/22	2022/23

Брендҳо ва сарпарастҳо

Давра	Истеҳсолкунандаи либос	Сарпарасти пироҳан
1980—1982	Adidas	-
1982—1985		Zanussi
1985—1989	Hummel	Parmalat
1989—1991		Reny Picot
1991—1992		Otaysa
1992—1994		Teka
1994—1998	Kelme
1998—2001	Adidas
2001—2002		Realmadrid.com
2002—2005		Siemens mobile
2005—2006		Siemens
2006—2007		BenQ-Siemens
2007—2013		Bwin
2013—то ҳол		Fly Emirates

Рӯйхати мавсимҳо

Мавсим Дивизион Мақом Ҷом Мусобиқаҳои байналмилалӣ 1929 1ª 2-юм Финалист 1929/30 1ª 5-ум Финалист 1930/31 1ª 6-ум 1/4 1931/32 1ª Қаҳрамон 1/8 1932/33 1ª Қаҳрамон Финалист 1933/34 1ª 2-юм Ғолиб 1934/35 1ª 2-юм 1/8 1935/36 1ª 2-юм Ғолиб 1939/40 1ª 4-ум Финалист 1940/41 1ª 6-ум 1/8 1941/42 1ª 2-юм 1/4 1942/43 1ª 10-ум Финалист 1943/44 1ª 7-ум 1/8 1944/45 1ª 2-юм 1/8 1945/46 1ª 4-ум Ғолиб 1946/47 1ª 7-ум Ғолиб 1947/48 1ª 11-ум 1/8 1948/49 1ª 3-юм 1/8 1949/50 1ª 4-ум 1/2 1950/51 1ª 9-ум 1/2 1951/52 1ª 3-юм 1/2 1952/53 1ª 3-юм 1/2 1953/54 1ª Қаҳрамон 1/2 1954/55 1ª Қаҳрамон 1/2 1955/56 1ª 3-юм 1/2 ҶҚ Ғолиб 1956/57 1ª Қаҳрамон 1/4 ҶҚ Ғолиб 1957/58 1ª Қаҳрамон Финалист ҶҚ Ғолиб 1958/59 1ª 2-юм 1/2 ҶҚ Ғолиб 1959/60 1ª 2-юм Финалист ҶҚ Ғолиб 1960/61 1ª Қаҳрамон Финалист ҶҚ 1/8 1961/62 1ª Қаҳрамон Ғолиб ҶҚ Финалист 1962/63 1ª Қаҳрамон 1/2 ҶҚ 1/8 1963/64 1ª Қаҳрамон 1/4 ҶҚ Финалист 1964/65 1ª Қаҳрамон 1/8 ҶҚ 1/4 1965/66 1ª 2-юм 1/4 ҶҚ Ғолиб 1966/67 1ª Қаҳрамон 1/4 ҶҚ 1/4 1967/68 1ª Қаҳрамон Финалист ҶҚ 1/2 1968/69 1ª Қаҳрамон 1/8 ҶҚ 1/8 1969/70 1ª 5-ум Ғолиб ҶҚ 1/8 1970/71 1ª 4-ум 1/16 ҶҶУ Финалист 1971/72 1ª Қаҳрамон 1/2 ҶУ 1/16 1972/73 1ª 4-ум 1/8 ҶҚ 1/2 1973/74 1ª 8-ум Ғолиб ҶУ 1/32 1974/75 1ª Қаҳрамон Ғолиб ҶҶУ 1/4 1975/76 1ª Қаҳрамон 1/2 ҶҚ 1/2 1976/77 1ª 9-ум 1/16 ҶҚ 1/8 1977/78 1ª Қаҳрамон 1/8 1978/79 1ª Қаҳрамон Финалист ҶҚ 1/8 1979/80 1ª Қаҳрамон Ғолиб ҶҚ 1/2 1980/81 1ª 2-юм 1/4 ҶҚ Финалист 1981/82 1ª 3-юм Ғолиб ҶУ 1/4 1982/83 1ª 2-юм Финалист ҶҶУ Финалист 1983/84 1ª 2-юм 1/2 ҶУ 1/32 1984/85 1ª 5-ум 1/8 ҶУ Ғолиб 1985/86 1ª Қаҳрамон 1/2 ҶУ Ғолиб 1986/87 1ª Қаҳрамон 1/2 ҶҚ 1/2 1987/88 1ª Қаҳрамон 1/2 ҶҚ 1/2 1988/89 1ª Қаҳрамон Ғолиб ҶҚ 1/2 1989/90 1ª Қаҳрамон Финалист ҶҚ 1/8 1990/91 1ª 3-юм 1/8 ҶҚ 1/4 1991/92 1ª 2-юм Финалист ҶУ 1/2 1992/93 1ª 2-юм Ғолиб ҶУ 1/4 1993/94 1ª 4-ум 1/4 ҶҶУ 1/4 1994/95 1ª Қаҳрамон 1/8 ҶУ 1/8 1995/96 1ª 6-ум 1/8 ЛҚ 1/4 1996/97 1ª Қаҳрамон 1/8 1997/98 1ª 4-ум 1/8 ЛҚ Ғолиб 1998/99 1ª 2-юм 1/2 ЛҚ 1/4 1999/00 1ª 5-ум 1/4 ЛҚ Ғолиб 2000/01 1ª Қаҳрамон 1/32 ЛҚ 1/2 2001/02 1ª 3-юм Финалист ЛҚ Ғолиб 2002/03 1ª Қаҳрамон 1/4 ЛҚ 1/2 2003/04 1ª 4-ум Финалист ЛҚ 1/4 2004/05 1ª 2-юм 1/8 ЛҚ 1/8 2005/06 1ª 2-юм 1/2 ЛҚ 1/8 2006/07 1ª Қаҳрамон 1/8 ЛҚ 1/8 2007/08 1ª Қаҳрамон 1/8 ЛҚ 1/8 2008/09 1ª 2-юм 1/16 ЛҚ 1/8 2009/10 1ª 2-юм 1/16 ЛҚ 1/8 2010/11 1ª 2-юм Ғолиб ЛҚ 1/2 2011/12 1ª Қаҳрамон 1/4 ЛҚ 1/2 2012/13 1ª 2-юм Финалист ЛҚ 1/2 2013/14 1ª 3-юм Ғолиб ЛҚ Ғолиб 2014/15 1ª 2-юм 1/8 ЛҚ 1/2 2015/16 1ª 2-юм баъди 1/16 ҳазф шуд ЛҚ Ғолиб 2016/17 1ª Қаҳрамон 1/4 ЛҚ Ғолиб 2017/18 1ª 3-юм 1/4 ЛҚ Ғолиб 2018/19 1ª 3-юм 1/2 ЛҚ 1/8 2019/20 1ª Қаҳрамон 1/4 ЛҚ 1/8 2020/21 1ª 2-юм 1/16 ЛҚ 1/2 2021/22 1ª Қаҳрамон 1/4 ЛҚ Ғолиб 2022/23 1ª 2-юм Ғолиб ЛҚ 1/2 2023/24 1ª - - -

Варзишгоҳ

Дохили варзишгоҳи «Сантияго Бернабеу»

• Сантияго Бернабеу
• Ғунҷоиш — 81044 нафар.
• Андозаи майдон — 107 x 72 метр.
• Суроға — Concha Espina, 1 28036 Мадрид.

Омори иштирок дар мусобиқаҳо

Тибқи 19-уми июни соли 2023

Чемпионати Испониё

«Реал»-и Мадрид (дар баробари «Барселона» ва «Атлетик Билбао») дар тамоми чемпионатҳои кишвар иштирок кардааст. Мақоми аввал - 35 маротиба, дуюм - 25 маротиба, сеюм - 10 маротиба, яъне дар маҷмӯъ бошгоҳ 70 мавсим ба қатори ҷоизадорон роҳ ёфтааст. Инчунин 8 маротиба як қадам дур аз сегона, 3 бор — панҷум, 4 маротиба — шашум, 2 бор — ҳафтум, 1 бор — ҳаштум, 2 маротиба — нӯҳум, 1 бор — даҳум ва 1 бор — ёздаҳумро (соли 1948) ишғол кардааст.

Мусобиқаҳои байналмилалӣ

Мусобиқа	Бозӣ	Ғалаба	Мусовӣ	Бохт	ГЗ	ГС	+/-	Ғ%
Ҷоми Қаҳрамонони Урупо/Лигаи қаҳрамонҳо	7002476000000000000♠476	7002285000000000000♠285	7001810000000000000♠81	7002110000000000000♠110	7003104700000000000♠1 047	7002521000000000000♠521	+526
Ҷоми ҷомдорони УЕФА	7001310000000000000♠31	7001160000000000000♠16	7000900000000000000♠9	7000600000000000000♠6	7001570000000000000♠57	7001240000000000000♠24	+33
Ҷоми УЕФА/Лигаи Урупо	7001640000000000000♠64	7001330000000000000♠33	7001100000000000000♠10	7001210000000000000♠21	7002111000000000000♠111	7001750000000000000♠75	+36
Суперҷоми УЕФА	7000700000000000000♠7	7000400000000000000♠4	5000000000000000000♠0	7000300000000000000♠3	7001130000000000000♠13	7001110000000000000♠11	+2
Ҷоми байниқораӣ	7000700000000000000♠7	7000300000000000000♠3	7000100000000000000♠1	7000300000000000000♠3	7001100000000000000♠10	7000800000000000000♠8	+2
Ҷоми бошгоҳҳои ҷаҳон	7001140000000000000♠14	7001120000000000000♠12	7000200000000000000♠2	5000000000000000000♠0	7001400000000000000♠40	7001150000000000000♠15	+25
Ҳамагӣ	7002599000000000000♠599	7002353000000000000♠353	7002103000000000000♠103	7002143000000000000♠143	7003127800000000000♠1 278	7002654000000000000♠654	+624	7001589300000000000♠58,93

Сарвонҳои «Реал»-и Мадрид

Устураи «Реал Мадрид» – Раул

Бозикун	Фаъолият	Сарвонӣ	Шумора	Миқдори бозӣ
Феликс Кесада	1922 — 1936	1928 — 1936		87 (2)
Хасинто Кинкосес	1931 — 1942	1936 — 1942		167 (0)
Хосе Рамон Сауто	1933 — 1944	1942 — 1944		143 (0)
Хуан Ипиня	1939 — 1949	1944 — 1949		302 (6)
Мигел Мунёс	1948 — 1958	1949 — 1958		275 (24)
Хуан Алонсо	1949 — 1961	1958 — 1960		296 (-337)
Хосе Мария Заррага	1951 — 1962	1960 — 1962		217 (5)
Франсиско Хенто	1953 — 1971	1961 — 1971	11	761 (253)
Игнасио Соко	1962 — 1974	1971 — 1974		318 (8)
Амансио Амаро	1962 — 1976	1971 — 1976	7	471 (154)
Пирри	1964 — 1979	1976 — 1979	4	595 (210)
Мигел Анхел	1967 — 1986	1980 — 1986		319 (-262)
Карлос Сантийяна	1971 — 1988	1979 — 1988	9	774 (349)
Хосе Антонио Камачо	1973 — 1989	1988 — 1989	3	577 (11)
Чендо	1979 — 1998	1989 — 1993	2	497 (3)
Мануэл Санчис	1983 — 2001	1988 — 2001	5	710 (49)
Фернандо Йерро	1989 — 2003	2001 — 2003	4	601 (126)
Раул Гонсалес	1994 — 2010	2003 — 2010	7	854 (361)
Икер Касиляс	1999 — 2015	2010 — 2015	1	725 (-771)
Серхио Рамос	2005 — 2021	2015 — 2021	4	671 (101)
Марсело	2007 — 2022	2021 — 2022	12	542 (38)
Карим Бензема	2009 — 2023	2022 — 2023	9	648 (354)
Начо Фернандес	2010 — то ҳол	2023 — то ҳол	6	318 (16)

Ҷоизаҳо

Миллӣ

• Чемпионати Испониё:
  • Қаҳрамон (35, рекорд): 1931/32; 1932/33; 1953/54; 1954/55; 1956/57; 1957/58; 1960/61; 1961/62; 1962/63; 1963/64; 1964/65; 1966/67; 1967/68; 1968/69; 1971/72; 1974/75; 1975/76; 1977/78; 1978/79; 1979/80; 1985/86; 1986/87; 1987/88; 1988/89; 1989/90; 1994/95; 1996/97; 2000/01; 2002/03; 2006/07; 2007/08; 2011/12; 2016/17; 2019/20; 2021/22
  • Ноиби қаҳрамон (25): 1929; 1933/34; 1934/35; 1935/36; 1941/42; 1944/45; 1958/59; 1959/60; 1965/66; 1980/81; 1982/83; 1983/84; 1991/92; 1992/93; 1998/99; 2004/05; 2005/06; 2008/09; 2009/10; 2010/11; 2012/13; 2014/15; 2015/16; 2020/21; 2022/23
  • Мақоми сеюм (10): 1948/49; 1951/52; 1952/53; 1955/56; 1981/82; 1990/91; 2001/02; 2013/14; 2017/18; 2018/19
• Ҷоми Испониё
  • Ғолиб (20): 1905; 1906; 1907; 1908; 1917; 1934; 1936; 1946; 1947; 1961/62; 1969/70; 1973/74; 1974/75; 1979/80; 1981/82; 1988/89; 1992/93; 2010/11; 2013/14; 2022/23
  • Финалист (20): 1903; 1916; 1918; 1924; 1929; 1930; 1933; 1940; 1943; 1958; 1959/60; 1960/61; 1967/1968; 1978/79; 1982/83; 1989/90; 1991/92; 2001/02; 2003/04; 2012/13
• Суперҷоми Испониё
  • Ғолиб (12): 1988; 1989; 1990; 1993; 1997; 2001; 2003; 2008; 2012; 2017; 2019/20; 2021/22
• Ҷоми Эва Дуарте:
  • Ғолиб: 1947
• Ҷоми Ла Лига
  • Ғолиб: 1984/85
  • Финалист: 1982/83
• Ҷоизаи Манкомунадо
  • Ғолиб (23, рекорд): 1904/05, 1905/06, 1906/07, 1907/08, 1909/10, 1912/13, 1915/16, 1916/17, 1917/18, 1919/20, 1921/22, 1922/23, 1923/24, 1925/26, 1926/27, 1928/29, 1929/30, 1930/31, 1931/32, 1932/33, 1933/34, 1934/35, 1935/36

Байналмилалӣ

• Лигаи Қаҳрамонҳои УЕФА
  • Ғолиб (14, рекорд): 1956, 1957, 1958, 1959, 1960, 1966, 1998, 2000, 2002, 2014, 2016, 2017, 2018, 2022
  • Финалист (3): 1962, 1964, 1981
• Ҷоми УЕФА
  • Ғолиб (2): 1985, 1986
• Ҷоми ҷомдорони УЕФА
  • Финалист (2): 1971, 1983
• Суперҷоми УЕФА
  • Ғолиб (5): 2002, 2014, 2016, 2017, 2022
  • Финалист (3): 1998, 2000, 2018
• Ҷоми футболи байниқораӣ
  • Ғолиб (3): 1960, 1998, 2002
• Ҷоми бошгоҳҳои ҷаҳон
  • Ғолиб (5, рекорд): 2014, 2016, 2017, 2018, 2022
• Ҷоми ҷаҳонии хурд
  • Ғолиб (2, рекорд): 1952, 1956
  • Финалист: 1963
• Ҷоми Лотин
  • Ғолиб (2): 1955, 1957
• Ҷоми иберо-америкоӣ
  • Ғолиб: 1994
• Ҷоми иберӣ
  • Финалист: 2000
• Ҷоми Франс Беккенбауэр
  • Ғолиб: 2010
• Ҷоми Сантияго Бернабеу
  • Ғолиб (28, рекорд): 1981, 1983, 1984, 1985, 1987, 1989, 1991, 1994, 1995, 1996, 1997, 1998, 1999, 2000, 2003, 2005, 2006, 2007, 2008, 2009, 2010, 2011, 2012, 2013, 2015, 2016, 2017, 2018
  • Финалист (9): 1980, 1986, 1988, 1990, 1992, 1993, 2001, 2002, 2004

Рекордҳо

Рекордҳои бошгоҳ

Тибқи санаи 30-юми майи соли 2022.

• 14 ғалаба дар Лигаи қаҳрамонҳои УЕФА
• 3 ғалабаи пайиҳам дар Лигаи қаҳрамонҳо
• 278 ғалаба дар бозиҳои Лигаи қаҳрамонҳои УЕФА
• 43 бозии хонагӣ пайиҳам «Реал» дар Лигаи қаҳрамонҳои УЕФА гол задааст
• 35 ҷоми қаҳрамонии Испониё
• 121 гол дар як мавсими чемпионати Испониё
• 73 бозӣ пайиҳам «Реал» ҳадди ақалл як гол задааст

Рекорди бозикунҳо

Тибқи санаи 6-уми декабри соли 2017.

• Криштиану Роналду — 17 гол дар як мавсими Лигаи Қаҳрамонҳои УЕФА
• Криштиану Роналду — 11 гол дар як мавсими марҳилаи гурӯҳии Лигаи Қаҳрамонҳои УЕФА
• Криштиану Роналду — 19 гол дар як соли тақвимии Лигаи Қаҳрамонҳои УЕФА

Бар асоси теъдоди бозиҳо

• Ин феҳристи бозикунонест, ки дар таърихи бошгоҳ аз ҳама бештар бозӣ кардаанд.
• Тибқи санаи 4-уми июни соли 2023.

№	Ном	Замон	Ла Лига	Ҷоми Шоҳ	Ҷомҳои урупоӣ	Дигарон	Бозиҳо
1	Гонсалес, РаулРаул Гонсалес	1994—2010	550	37	132	22	741
2	Касиляс, ИкерИкер Касиляс	1999—2015	510	40	152	23	725
3	Санчис, МануэлМануэл Санчис	1983—2001	523	67	100	20	710
4	Рамос, СерхиоСерхио Рамос	2005—2021	469	48	129	25	671
5	Бензема, КаримКарим Бензема	2009-2023	439	44	133	27	648
6	Сантийяна, КарлосКарлос Сантийяна	1971—1988	461	84	87	13	645
7	Йерро, ФернандоФернандо Йерро	1989—2003	439	43	103	16	601
	Хенто, ФрансискоФрансиско Хенто	1953—1971	428	74	95	4	601
9	Камачо, Хосе АнтониоХосе Антонио Камачо	1973—1989	414	61	90	12	577
10	, ПирриПирри	1964—1980	417	67	75	2	561

Бар асоси теъдоди голҳо

• Ин феҳристи бозикунонест, ки дар таърихи бошгоҳ аз ҳама бештар гол задаанд.
• Тибқи санаи 4-уми июни соли 2023.

№	Ном	Замон	Голҳо	Бозиҳо
1	Роналду, КриштиануКриштиану Роналду	2009—2018	450	438
2	Бензема, КаримКарим Бензема	2009—2023	354	648
3	Гонсалес, РаулРаул Гонсалес	1994—2010	323	741
4	Ди Стефано, АлфредоАлфредо Ди Стефано	1953—1964	308	396
5	Сантийяна, КарлосКарлос Сантийяна	1971—1988	290	645
6	Пушкаш, ФеренсФеренс Пушкаш	1958—1966	242	262
7	Санчес, УгоУго Санчес	1985—1992	208	282
8	Хенто, ФрансискоФрансиско Хенто	1953—1971	182	601
9	, ПирриПирри	1964—1979	172	561
10	Бутрагенйо, ЭмилиоЭмилио Бутрагенйо	1983—1995	171	463

Ҳайати ҳозира

• Тибқи санаи 18-уми июни соли 2023

№	Бозигар	Кишвар	Рӯзи таваллуд
Дарвозабонҳо
1	Тибо Куртуа		11 май 1992(19920511)
13	Андрей Лунин		11 феврал 1999(19990211)
Муҳофизатгарон
2	Дани Карвахал		11 январ 1992(19920111)
3	Эдер Милитао		18 январ 1998(19980118)
4	Давид Алаба		24 июн 1992(19920624)
6	Начо		18 январ 1990(19900118)
16	Алваро Одриосола		14 декабр 1995(19951214)
17	Лукас Васкес		1 июл 1991(19910701)
20	Фран Гарсиа		14 август 1999(19990814)
22	Антонио Рӯдигер		3 март 1993(19930303)
23	Ферлан Менди		8 июн 1995(19950608)
24	Хесус Вайехо		5 январ 1997(19970105)
Миёнмайдонӣ
5	Ҷуд Беллингҳем		29 июн 2003(20030629)
8	Тони Кроос		4 январ 1990(19900104)
10	Лука Модрич		9 сентябр 1985(19850909)
12	Эдуардо Камавинга		10 ноябр 2002(20021110)
15	Федерико Валверде		22 июл 1998(19980722)
18	Урелён Чуамени		27 январ 2000(20000127)
19	Дани Себайёс		7 август 1996(19960807)
Ҳамлаварон
7	Винисиус Ҷуниор		12 июл 2000(20000712)
11	Родриго		9 январ 2001(20010109)
21	Браҳим Диас		3 август 1999(19990803)

Гузаришҳо 2023/2024

Омаданд

Мавқеъ	Бозигар	Бошгоҳи пешина
Ҳимоятгар	Фран Гарсиа	«Раё Вайекано»
Миёнмайдон	Антонио Бланко**	«Алавес»
Миёнмайдон	Арда Гӯлер	«Фенербахче»
Миёнмайдон	Ҷуд Беллингҳем	«Боруссия Дортмунд»
Ҳамлагар	Браҳим Диас**	«Милан»
Ҳамлагар	Хоселу*	«Эспанёл»
Ҳамлагар	Хуанми Латаса**	«Хетафе»

Рафтанд

Мавқеъ	Бозигар	Бошгоҳи оянда
Ҳимоятгар	Хесус Вайехо*	«Гранада»
Ҳамлагар	Мариано Диас***
Ҳамлагар	Марко Асенсио***	«Пари Сен-Жермен»
Ҳамлагар	Карим Бензема***	«Ал-Иттиҳод»
Ҳамлагар	Эден Азар***

* Ба иҷора
** Аз иҷора
*** Бозигари озод

Шахсиятҳо

Ҳайати мураббигарӣ

Карло Анчелотти, сармураббии бошгоҳ дар солҳои 2013—2015, аз соли 2021–то ҳол

Зайниддин Зидон, сармураббии бошгоҳ дар солҳои 2016—2018, 2019—2021

Ҷозе Моуринё, сармураббии бошгоҳ дар солҳои 2010—2013

Вазифа	Ном
Сармураббӣ	Карло Анчелотти
Дастёри сармураббӣ	Давиде Анчелотти
Дастёри сармураббӣ	Франческо Маури
Мураббии дарвозабонҳо	Луис Лйопис
Мураббии бадансоз	Антонио Пинтус
Мураббии бадансоз	Бенямино Фулко
Таҳлилгари фаннӣ	Симоне Монтанаро
Физиотерапевт	Хосе Карлос Гарсия Парралес

Феҳристи сармураббиён

Артур Ҷонсон (1910—1920) Хуан де Карсер (1920—1926) Педро Лйоренте (1926) Сантияго Бернабеу (1926—1927) Хосе Берраондо (1927—1929) Хосе Киранте (1929—1930) Липпо Ҳертска (1930—1932) Роберт Фирст (1932—1934) Франсиско Бру (1934—1941) Хуан Армет (1941—1943) Рамон Энсинас (1943—1945) Хасинто Кинкосес (1945—1946, 1947—1948) Балтасар Албенис (1946—1947, 1950—1951) Майкл Кипинг (1948—1950) Эктор Скароне (1951—1952) Хуан Антонио Ипиня (1952—1953) Энрике Фернандес (1953—1954) Хосе Вилялонга (1954—1957) Луис Карниглия (1957—1959; 1959) Мигел Мунёс (1959; 1960—1974) Мануэл Флейтас (1959—1960) Луис Моловни (1974; 1977—1979; 1982; 1985—1986)