Салоҳияти кумита ва комиссияҳои Маҷлиси намояндагон

Салоҳияти кумита ва комиссияҳои Маҷлиси намояндагон — Қонуни конститутсионӣ «Дар бораи Маҷлиси Олии Ҷумҳурии Тоҷикистон» муқаррар менамояд, ки салоҳият, тартиби фаъолияти кумитаю комиссияҳоро Дастури Маҷлиси намояндагон ба танзим медарорад (моддаи 50). Кумита ва комиссияҳои Маҷлиси намояндагон:

а) мутобиқи қарори Шӯрои Маҷлиси намояндагон лоиҳаи қарору қонунҳо ва дигар санадҳои меъёрию ҳуқуқиро қаблан баррасӣ менамоянд ва ба онҳо хулоса медиҳанд;

б) муҳокимаи парламентиро ташкил мекунанд;

в) ба лоиҳаи Қонун дар бораи буҷети давлатии Ҷумҳурии Тоҷикистон хулоса медиҳанд ва таклифҳо пешниҳод мекунанд;

Инчунин Дастури Маҷлиси намояндагон салоҳияти хоси ҳар як Кумита ва комиссияро муқаррар намудааст. Масалан, салоҳияти кумита оид ба қонунияти конститутсионӣ, қонунгузорӣ ва ҳуқуқи инсон ба таври зерин муқаррар шудааст:

1. Қонунгузорӣ оид ба тафсири Конститутсия, қонунҳои конститутсионӣ ва қонунҳо;

2. Қонунгузорӣ оид ба ҳифзи ҳуқуқҳои конститутсионӣ, озодии инсон ва шаҳрванд;

3. Қонунгузорӣ оид ба масъалаҳои шаҳрвандӣ, ҳолати ҳуқуқии шаҳрвандони хориҷӣ ва шахсони бетабаа;

4. Қонунгузории маъмурӣ;

5. Қонунгузории гражданӣ, мурофиаи гражданӣ ва мурофиаи хоҷагӣ;

6. Қонунгузории ҷиноятӣ, мурофиаи ҷиноятӣ ва иҷрои ҷазои ҷиноятӣ;

7. Қонунгузорӣ дар бораи низоми судӣ, мақоми судяҳо ва иттиҳодияҳон судӣ;

8. Қонунгузорӣ дар бораи мақомоти адлия, прокуратура, адвокатура ва нотариат;

9. Қонунгузорӣ дар бораи мукофотҳои давлатӣ;

10. Қонунгузорӣ дар бораи истеҳсоли (коргузории) иҷроиявӣ;

11. Қонунгузорӣ оид ба маблағгузории мақомот ва ташкилотҳое, ки фаъолияти онҳо ба ваколати кумита дахл дорад ва назорати иҷрои он;

12. Масъалаҳои ҳуқуқӣ оид ба авф ва татбиқи авф;

13. Таҳлили қонунгузорӣ оид ба масъалаҳое, ки ба ваколати кумита дохиланд;

14. Тайёр намудани пешниҳодҳо барои дохил намудан ба Барномаи намунавӣ ва нақшаи тақвимии Маҷлиси намояндагон оид ба масъалаҳое, ки ба ваколати кумита дохиланд;

15. Созмон додани алоқаҳои байнипарлумонӣ бо кумита ва комиссияҳои марбутаи Ассамблеяи байнипарлумонии давлатҳои иштирокчии Иттиҳоди Давлатҳои Мустақил ва парлумонҳои дигар давлатҳо;

16. Омӯхтани зарурат ва имконияти сафари аъзои кумита ба кишварҳои дигар барои иштирок намудан дар ҷаласаҳои байналмилалии парламентҳо ва дар ин бора ба Шӯрои Маҷлиси намояндагон пешниҳод намудани таклиф;

17. Фаъолияти қонунгузорӣ, таҳияи хулоса, гузоришҳо ва амалӣ намудани дигар масъалаҳое, ки ба салохияти кумита дохил мешаванд.

Нигаред низ

Салоҳияти кумита ва комиссияҳои Маҷлиси миллӣ